Dizionari de Lenghe Furlane

lâ là    [AF]

1. loc.v. soredut intal imp., in interiezions o esclamazions che a vuelin mandâ cdn. a fâ alc o sburtâlu:  il Signôr al disè a sant Pieri: "Va là, Pieri, fati fâ la caritât da Meni Fari" (Luigi Gortani, Meni Fari)
   
   1. par riclamâ o par dâ plui enfasi in maniere gjeneriche:  «Calme, calmiti, benedet. No fasarès tant il bulo, se o fos in te». «Ce volêso dî?» « Va là, che tu mi âs capît benon» (Carlo Sgorlon, Prime di sere); "Oh! va là, va là… lassìn stâ chest discors" (Pieri Somede dai Marcs, Vilie di Nadâl (teatri))
   2. par mostrâ che no si è in cunvigne cun alc, che no si crôt che al sedi pussibil, che si à maravee e v.i.:  «Ma nol saressial di spietâ doman, e contâi dut al professôr? Al viodarà lui no?» «Ma va là! Se tu vessis vût voie di fâ cussì, cumò, no tu saressis achì» (Raffaele Serafini, Soreli jevât a mont)
   3. par pandi une concession:  "A mi displâs sul serio." "Pa la sensarie pierdude? Ta la paiarai jo, va là. Ce aio di dâti?" (Anute Fabris, A passe la scalmane)

Components:

• là av., inter.
• lâ v.intr., s.m.sing.