Dizionari de Lenghe Furlane

chi¹  chi  [FO]

1. av. al indiche il puest dulà che al è cui che al fevele o un puest une vore dongje:  Deline! - Zuantoni, abàs - Deline! Ven jù, ven jù chi! - al zigave sù pe trombe des scjalis - Ven jù chi, gjo (Dino Virgili, La massarie); creature, mê, sclopon gno, ven mo chi de tô mame… (Meni Ucel, Tirâ sù fruts); Chine, sente chi un moment cun me, stami dongje, Chine (Dino Virgili, «…e là four dal nuestri cjamp…»)
   Sin. acà , ca¹ , ca vie , chenti , venti ca
   Var. achì
   
   1. par indicâ une part dal cuarp di cui che al fevele:  «Capissial, siôr dotôr? Come che o ves i gjats jù pe schene; e une fadie a tirâ flât. E chi ret», e dîs puartant la man daûr de schene (Meni Ucel, Tant parom)
   2. puest a pene citât o che si è li li par citâ:  a jerin vignûts a gjavâle [la piere] tal Polenton a Zeanut; ma ancje chi e je finide a la svelte, e cussì a son vignûts fin te Selve (Pieri Menis, Il miracul dal plevan di Trep)
   3. ancje cence une relazion di vicinance precise, soredut se in corelazion o oposizion cun altris averbis di lûc:  "Tu chi, tu là", a berlavin pocant e sburtant par intop, une metât di presonîrs par bande (Ivano Urli, Storie di Min)
   4. inter. par introdusi une frase, manifestant la presince di cdn., dispès di cui che al fevele, intal puest là che si è:  mi cirivistu? Chi che o soi
   5. tant che ordin di stâ o di vignî dongje:  chi, fer e scolte, se di no mi rabii
2. av. cence une vere definizion di lûc, plui par indicâ a chest pont, in chest moment, in cheste situazion e v.i.:  si à començât a sintî a dî che ca e là a metevin sù une "vuardie nazionâl pe sigurece dal popul" … Alore chi le àn nasade a colp: la vuardie e jere pe sigurece dai siôrs, parcè che pal popul al è vonde cualchi vuardian (Riedo Pup, Il prin moto)
3. adi.inv. che al è dongje:  al è il siôr, chi, che al fevele dai fruts, di tiei fîs (Meni Ucel, La visite dal vescul); «O fevelavi cu la tô parone chi», i rispuint lui, «dal ce mâl che si presente la campagne chest an» (Meni Ucel, Pensâ mâl); o larai vie ancje jo, come la famee chi sot (Maurizio Mattiuzza, La maiute di Zidane)

Polirematichis e espressions idiomatichis

• chel chi loc.adi., loc.pron.
• chest chi loc.adi., loc.pron.
• di chi indenant loc.av.
• di chi indevant loc.av.