Dizionari de Lenghe Furlane

culì  cu|lì  [FO]

1. av. tal lûc là che si cjate cui che al è daûr a fevelâ o une vore dongje a cui che al è daûr a fevelâ:  Se la none Catine e fos culì, si stroparès lis orelis, cemût che e faseve co mi scjampave di bocje cualchi robone (Gianni Gregoricchio, Trê feminis); "Oh, dotôr, buine sere. Podìno vê il plasê di vêlu in nestre compagnie? Che si comodi culì". E mi faseve puest (Alan Brusini, Gian Paolo Linda, I forescj)
   Sin. acà , achì , aculì , chenti , chi¹ , ca¹
   
   1. par indicâ une part dal cuarp di cui che al fevele:  no pues migo dismenteâ chê bastonade che a mi à fracassât la gjambe e par simpri çueteât, e chê mieze tace di vueli di riç che strenzintmi il nâs mi àn fat parâ jù par il gargat le ai inmò culì sul stomi (Pieri Somede dai Marcs, Un pugn di moscjis)
   2. puest a pene citât o che si è li li par citâ:  i vecjos [alpins] culì a Cividât, a stevin te barache di mieç, une cualitât di Casbac a ulà che nissun uficiâl si jere mai infidât a lâ dentri (Alan Brusini, I universitaris)
   3. ancje cence une relazion di vicinance precise, soredut se in corelazion o oposizion cun altris averbis di lûc:  i partîts di vuê a son la plui part internazionâi, ancje se culì a puartin un non e culà un altri (Josef Marchet, Sul ôr de buse…)
   4. ancje in espressions di comant, sedi par segnâ un puest sedi la persone che e fevele:  Toni, il cont culì! (Dolfo Zorzut, La furlane)
2. av. doprât dome par rinfuarcî il sens, soredut di un dimostratîf:  cheste robe culì no si po dimostrâ cun argoments. Si po dome crodile (Francesc Placerean, Crist resurît al colme dute la sperance dal om)
   Sin. acà , achì , aculì , ad achì , chi¹ , ca¹
   
   1. zontât al dimostratîf "chel" al fâs che al segni alc che al è dongje di cui che al fevele e no alc che al è lontan:  aio di crodi jo che e duri tant a lunc chê comedie culì! (Alan Brusini, La cartuline); «Che al cjali, dotôr, chel riçûl culì», al diseve Bastian mostrant la cope al miedi, «al è un pôc che no mi lasse durmî, chel boie!». (Alan Brusini, Il malât di Cime Undis)
3. av. cence une vere definizion di lûc, plui par indicâ a chest pont, in chest moment, in cheste situazion e v.i.:  la zovine, graciose e cuntun morbin dut so, i jentrâ intal gjeni: di culì a inamorâsi, il pas al fo curt e dal sigûr jê i de un bon jutori (Gianni Gregoricchio, Trê feminis)
   Sin. acà , achì , aculì , ad achì , ca¹ , chi¹
4. adi.inv. che al è dongje, che si è fevelât o che si è li li par fevelâ di lui:  ma voaltris parcè crodêso che il nestri ostîr culì al si fasi vignî sù chestis ideis (Laurin Zuan Nardin, L'orcul)
   Sin. acà , achì , aculì , ad achì , ca¹ , chi¹

Polirematichis e espressions idiomatichis

• chel culì loc.adi., loc.pron.
• chest culì loc.adi., loc.pron.
• chi dentri loc.av.
• culì dentri loc.av.
• di culì indenant loc.av.
• di culì indevant loc.av.

Proverbis:

• Sant Michêl che al dîs il vêr, se nol è culì, al è culì