Dizionari de Lenghe Furlane

finît  fi|nît  [FO]

1. p.pass., adi. viôt finî , viôt finîsi
   Var. finût
   
   1. dispès in costruzions temporâls introdusudis di "a" e cuntun sostantîf:  a vora finida, il stagnin al tirava dongja i sio imprescj (Novella Cantarutti, Il stagnin); no stâ dâi plui di doi mil par cumò. Il rest lu darà il to om a afâr finît (Maria Forte, La tiere di Lansing)
   2. in temporâls cence verp ausiliâr:  sâstu za ce che tu fasarâs, dopo finidis lis mediis? (Carlo Sgorlon, Prime di sere); fin che ve fîcs di mangjâ, mancul mâl; ma finîts chei, e dovè adatâsi a vivi di rosade (Luigi Gortani, Meni Fari); i students cul presalari dal guvier, subit finîts i cuindis agns, a vuadagnin avonde par infotâsi dai gjenitôrs e di ogni slaif (Pieri Piçul, Vieri e gnûf)
2. adi. che al è stât puartât insom:  al viodeve bielzà cu la fantasie la fabriche finide e in funzion (Carlo Sgorlon, Ombris tal infinît); un pâr di dalminis che jes ai prometudis par usgnot, e par usgnot al vûl vêlis fatis e finidis (Josef Marchet, Lis predicjis dal muini); Guri al restà cu la bocje vierte a cjalâ la sô cjase finide (Dino Virgili, La aghe da pît la cleve)
   
   1. che al è rivât insom:  vecjaie. A 'ndi veve novantecuatri finîts (Meni Ucel, Jenfris)
3. adi. che al à dutis lis sôs parts cemût che al covente:  par sei une bolp finide, i mancjave nome la code (Alan Brusini, Un om di mont)
   Sin. perfet , complet
4. adi. di un lavoradôr, di un artesan, di un artist e v.i., che al à finît di fâ di garzon, che aromai al è espert:  al sa cusinâ di dut e ben, al è cogo finît
   Sin. espert , franc , navigât , sfrancjât , valent
5. adi. lât o rivât par câs o cence volê:  di chei che a jerin a stâ dentri no si saveve nuie. Dispierdûts, finîts cuissà indulà (Carlo Sgorlon, Ombris tal infinît)
6. adi. (fig.) doprât fin insom:  butâ vie lis latis di vueli finidis
   Sin. brusât , lât¹ , mangjât , suiât
   
   1. di marcjanzie, vendude dute:  mandâi al furnidôr la liste dai articui finîts
      Sin. brusât , lât¹ , suiât
   2. di batarie, acumuladôr e v.i., che no i vanze plui energjie:  lis pilis finidis no si puedin butâ tes scovacis indiferenziadis
      Sin. suiât
7. adi. une vore strac:  o ai corût vincj chilometris, ma i ultins cinc o jeri finît
   Sin. acanât , canât , cuet¹ , discunît , disfat , disgnervât , dismedolât , madûr , nichilît , brusât , scanât , sfinît
8. adi. di cdn., lât in ruvine, che nol à plui resons ni sperancis:  se mi cjolessis la muiniance, che le pratichi di trente agns incà, sore nuie, o sarès un om finît (Josef Marchet, Lis predicjis dal muini)
   Sin. copât , cuet¹ , distrut , lât¹ , muart² , spedît , disperât
9. adi. che nol è plui:  tes cjançons di jê a jerin amôrs finîts e fantatis no plui bussadis (Agnul di Spere, La pueme cu la vôs biele); al jere l'arbul gjenealogjic di une famee siore finide (Pieri Menis, Mascaris e… maraveis)
   Sin. passât , lât¹
   
   1. che nol è plui vîf, muart:  un luminut a vueli al treme e al art sul scabel e un linzûl tirât sul jet al segne a pene i contors fers, dûrs di une vite finide (Pieri Somede dai Marcs, Une lûs celestine…)
      Sin. trapassât , defont
10. adi. filos. che al è limitât:  cheste puare creature finide tes sôs pussibilitâts e infinide tes sôs bramis (Antoni Beline, Sant Jacum, là che al finìs il mont); o sin componûts di parts, o sin part di un dut, di un dut che al pues jessi dome finît, o se tu âs miôr, indefinît (Fabian Ros, Il lôf)
11. adi. [TS] mat. di insiemi, che al à corispondence biunivoche cuntun insiemi limitât di numars naturâi:  une operazion matematiche di sume di valôrs finîts (Lorenzo Marcolini, L'articul di Einstein dal 1905 sul efiet fotoeletric. Un lavôr plurilengâl voltât in lenghe furlane); une sorzint discrete, vâl a dî une sorzint che si pues rapresentâ cuntun alfabet fat di un numar finît di simbui (Valentino Castellani, La societât de informazion: cirint lis origjins)
    
    1. di funzion, in oposizion a infinitesim
12. adi. [TS] gram. di mût verbâl, che al à persone, gjenar e numar, in oposizion a chei che no 'nd àn:  l'indicatîf, il condizionâl, il coniuntîf e l'imperatîf a son mûts finîts

Polirematichis e espressions idiomatichis

• e fieste finide loc.inter.
• fâ fieste finide loc.v.
• fâle finide loc.v.

Proverbis:

• cuant che si è muarts, al è finît dut
• i gjenitôrs a àn il dovê di mantignî i fîs fin che a àn sessante agns finîts; e po passâur il tabac
• lavôr mieç fat al è biel finît
• si cognòs il ben co al è finît e plui nol ven