Dizionari de Lenghe Furlane

prove  /-ò-/  pro|ve  [FO]

1. s.f. control des cualitâts, proprietâts, dal funzionament di un imprest o di un materiâl, des capacitâts, dal talent di une persone, de validitât di une idee, de veretât di une informazion:  plateformis di ciment armât pes provis dai canons (Ivano Urli, Storie di Min); la prove de leture a vôs alte e conferme la armonie metriche de traduzion di Visintin (Sandri Carrozzo, Note dal curadôr ae traduzion dal Infier di Dante)
   Sin. control , esam , esperiment , verifiche
   
   1. prin timp che si lavore intun puest, cuant che ancjemò no si è cjapâts fis:  i àn mandât la letare par che si presenti pal periodi di prove, pôc dopo fat il periodi di prove le àn cjapade come ausiliarie tal Ospedâl (Mario Beltramini, Jo e Graziella)
   2. il meti sù un vistît di sartorie par viodi se al à dibisugne di corezions o modificazions:  il stalîr i dîs une dì: "La nuvice dal princip a calcolin che e sei pôc sù pôc jù di te, e ti ordenin di lâ a provâ il so vistît." Lui al torne a vistîsi di princip e al salte fûr cuant che e à za il vistît in prove (Andreina Nicoloso Ciceri, I trê cjadreons - Racconti popolari friulani I)
2. s.f. session di preparazion di un spetacul:  i vin fat cjançonetas: e par fâlas a son coventâts: musiciscj e imprescj da sunâju, microfons e altoparlants, oras e oras di prova (Giorgio Ferigo, In forma di peraulas…); dopo trê mês di provis […] o ai podût verificâ che i atôrs sielzûts no dome a jerin ecelents ma che a vevin ancje un potenziâl par svilupâ une relazion straordenarie tra di lôr (Fabian Ros, Interviste cun Ignacio Vilar)
3. s.f. esperience direte:  Ilde e scugnî gloti la delusion, ma dome par rumiâle e sglonfâle dentri di se. Beltram a 'nt fasè la prove su la sô piel (Gianni Gregoricchio, Trê feminis)
   Sin. cercje , certificât , certificazion , esperience , segn , segnâl , testemoneance
4. s.f. sfuarç fat par rivâ a une ciert risultât:  une prove di organizâ partesans su lis monts, fate dal '64-'65 par ordin di Mazzini e finì in nuie pal scjars numar di chei che a rispuinderin (Josef Marchet, Cuintristorie dal Friûl fin sot la Italie); lis primis provis di costruî imprescj di contabilitât economiche nazionâl a puedin rimontâ a la Ingletiere dal Sîscent (Marzi di Strassolt, Dal Prodot Interni Lort aes misuris dal benstâ)
   Sin. cercje , ciment , colp , mostre¹ , scandai , volte
5. s.f. risultât di un sfuarç creatîf:  tal 1964 al jes Libers… di scugnî lâ, prime prove poetiche di Leonardo Zanier, che al denunzie la feride grande de emigrazion (Cristina Cescutti, Leterature furlane)
   Sin. opare , vore , lavôr
6. s.f. situazions o cundizion che e met devant di une dificoltât, che e impon un sfuarç:  la ultime prove, la ultime pene dal fi, che e jere ancje la sô pene, no le varès volude, … propit no (Maria Forte, Cjase di Dalban); i amîs i àn ancje preparât un biel çoc di len, che i nuviçs a àn di seâ insiemi, prime prove di une vite là che di sigûr lis dificoltâts di frontâ intune no mancjaran (Cristina Noacco, Faliscjis); puars mai nô se o falìn cheste prove, se cu la disconcuardie, la faziositât, la insipience o din reson ai corvats dal malauguri che a cuarnin il faliment des autonomiis! (Josef Marchet, E cumò?)
   Sin. mostre¹
7. s.f. intal lengaç de scuele, esperiment fat dal insegnant par controlâ la preparazion dal student:  l’esam di cognossince de lenghe e de culture ladine (clamât "patentin"), che al previôt une prove scrite e une orâl (Redazion SFF, Li che si insegne cul patentin)
   Sin. compit , esam , test
8. s.f. gare o part specifiche di une gare sportive:  tal decathlon a son provis di dîs specialitâts di atletiche lizere
9. s.f. segnâl, element o fat che al permet di capî e verificâ situazions, câs, fats, realtâts:  si son dimissionâts tal cors di chest an, dant une prove negative di individualisim e di iresponsabilitât (Adrian Cescje, Memoriis di politiche linguistiche); o resti fer come un basoâl. Se o volevi vê une prove de me stupiditât i soi rivât (Sandri Di Suald, Ah! la provincie)
   Sin. cercje , mostre¹ , reson , scandai
   
   1. [TS] dir. ce che si met a disposizion des parts par mostrâ la esistence di un dirit o la realtât di un fat:  un at formâl dal tribunâl che al ricognosseve la volontât di Eluana Englaro midiant di provis e testemoneancis (Christian Romanin, Amato De Monte: Il Friûl, patrie des bataiis di civiltât)
10. s.f. [TS] med. procediment di analisi par verificâ proprietâts o disposizions, in riferiment a un valôr standard di normalitât:  dopo lis provis dal sanc e podarà fâlu [fâ une donazion] (Pieri Somede dai Marcs, Il prossim); no esist une prove di laboratori pe sô diagnosi [de depression] (Guglielmo Pitzalis, Jù di cuarde. Ce fâ)

Polirematichis e espressions idiomatichis

• a prove di loc.prep.
• meti a la prove loc.v.
• meti a lis provis loc.v.
• meti a prove loc.v.
• meti ae prove loc.v.
• meti aes provis loc.v.