Dizionari de Lenghe Furlane

lusigne  /-ù-/  lu|si|gne  [AF]

1. s.f. tocut di materie une vore cjalde e slusinte che al ven fûr de frizion di metai o ancje di un fûc, di une esplosion, di robis che a brusin e v.i.:  «Pieri, o vês une cjavale che e je une raritât!» La bestie e dave une rugnadute e cu la talpe denant e raspave su la pedrade fintremai che e bateve lusignis, come se e ves volût saludâlu (Pieri Menis, Il «trono» dal von); a i butà parsore une altre cosse di cjarvon; e po jù ciertis tiradis di fol, che a emplarin dute la stanze di lusignis (Luigi Gortani, Il mestri sore ducj i mestris); a bati clap cun clap a saltin fûr lusignis
   Sin. falive , faliscje
   
   1. piçule scjarie eletriche
2. s.f. lûs che si riflet:  la aghe e rideve tal soreli smalitant di lusignis (Dino Virgili, Aghelusinte); Jê e jevà i voi de cjarte che e stave leìnt. I ocjaluts a mandarin une lusigne (Gianni Gregoricchio, Trê feminis)
   Sin. lamp¹ , riflès , rivoc , lampade¹
   
   1. (fig.) espression svelte o intense che si traviôt tai voi:  tun moment e nasseve une lusigne dentri dai voi des feminis, e tal dolôr mut dai umign che a spudavin sanc tal cjamp su la Stradegnove o dilunc dal flum, e slusicave une sperance vive (Dino Virgili, La aghe da pît la cleve); Checo si jere zirât de sô bande cuntune lusigne tai voi (Gianni Gregoricchio, Îr e doman)
      Sin. flame¹ , lamp¹ , lampade²
3. s.f. [AF, TS] entom.com. piçul inset, che al pues partignî a plui speciis di coleotars de famee dai Lampiridis,che al fâs lûs cui ultins segments dal adomen:  dopo la ore di gnot, al saltave fûr par denant, par parâ a durmî «la baronie». La «baronie» o jerin ancje nô che o corevin daûr aes lusignis (Maria Forte, La rive di Sant Pieri); uciei sui lens, merlots e tortorelis tai paîs, crots tai sfueaçs, grîs tai prâts, parfin lusignis tes cisis (Alan Brusini, Par stradis lungjis)
   Sin. pelegrin , pan gnûf
4. s.f. vision di piçulis lûs che a comparissin e a sparissin, par un mudament improvîs di pression, par difiets dai voi, par malatiis o par altris causis:  jê e à bisugne di polsâ, no ise vere che i pese il cjâf, che viôt lusignis tai voi (Pieri Somede dai Marcs, Ursule); jo, impins ancjemò par miracul, a sfreolâmi i voi, stufulît, par parâ vie lis lusignis che o viodevi, chês sì!, par chel croc [une legnade cjapade tal cjâf] (Pieri Menis, Chei di Muraie)
5. av. (fig.) cuantitât minime:  noaltris no vin ancjemò pierdude dal dut la sperance di podê dâ une buine scjassade tal stomi de nestre int, di podê dismovi cualchi lusigne di dignitât (Josef Marchet, Sudizion, la pecje dai furlans)
   Sin. piç , tic¹ , tinin , flât , freghenin , ninin , tininin , fruçon , ombre , ongule
   
   1. in funz. di av., in espressions negativis par rindi plui fuarte e assolude la negazion:  il frut de femine foreste al domandave di compagnâle [la fuiace] cuntun pôc di cicin. "O Jesus! cicin, fi mio? E son agns e agns che nô, puarins, no 'nd vin vidût lusigne!" (Catarine Percude, La fuiace de Madone)
      Sin. cree , nuie , gran , piç

Proverbis:

• di une lusigne al nas un grant fûc