Dizionari de Lenghe Furlane

formâ  for|mâ  [FO]

1. v.tr. dâ la forme, dâ une cierte forme:  si jere fermât a fâ l'Invier su la fornâs, stant che in chê stagjon no vevin cuet dut il modon che a vevin formât (Roberto Ongaro, Cretevierte); lis sôs oparis a dan cuarp a formis archetipichis, scomençant de tiere e dal pantan: materiâi di plasmâ, di formâ, di costruî (Erika Adami, I segrets de vite tun zermuei di tiere di cjamp)
   Sin. fâ , sacomâ , stampâ , stampanâ , stampanâ sù
2. v.tr. fâ nassi, fâ esisti intune cierte forme:  Charles Darwin al à mostrât che un dai principis dal disvilup de vite inte nature al è propit chel di formâ gnovis speciis (Franc Fari, Il cjâf dai furlans)
3. v.tr. [CO, TS] graf. origjinâ une forme gramaticâl:  [il furlan] al à une sô maniere di formâ il plurâl dai nons (Josef Marchet, Cuintristorie dal Friûl fin sot la Italie)
4. v.tr. (fig.) dâ une formazion, dâ valôrs, competencis e v.i.:  l'Istitût Tecnic e Comerciâl Antonio Zanon, che al varès formât i fîs dai contadins par che a deventassin impleâts, segretaris, dipendents des impresis che a nassin aromai par dut il Friûl (Angelo Floramo, Cuintristorie dal Nûfcent 1950-1960); la Universitât dal Friûl che e veve di permeti ai nestris zovins di studiâ e di formâ la classe professionâl e dirigjente di cheste tiere le vin otignude (Adrian Cescje, Tal non di Fausto Schiavi)
   Sin. costumâ , inscuelâ , insegnâ¹ , inviâ , plasmâ , sfrancjâ , tirâ sù
5. v.tr. meti intune un complès fat di plui elements o personis, ancje daûr di un ciert ordin:  Maurizio, chel che dopo al à formât il grup punk dai Krisma (Checo Tam, Beromünster e Monteceneri); no si tratave di formâ un partît o un grup di azion politiche, ma une socie di studi e di analisi politiche de situazion specifiche furlane (Adrian Cescje, Memoriis di politiche linguistiche)
   Sin. componi , costituî , dâ adun , dâ dongje , fâ , fâ sù , jessi¹ , meti dongje , tirâ adun
6. v.tr. jessi part di alc che al à une cierte forme, nature, cualitât e v.i.:  dôs filis di rôi che a formin come une bressane (Alan Brusini, Un dai pôcs); i Langobarts si jerin aromai ducj messedâts cui antîcs abitants dal Friûl e a formavin un sôl popul (Josef Marchet, Cuintristorie dal Friûl fin sot la Italie); viodûts dal alt, i coridôrs a jemplin lis stradis come afluents di un flum che al forme un estuari impressionant (Cristina Noacco, Faliscjis)
7. v.tr. vê caratar, vê nature di, cun significât che si pues assimilâ a chel di jessi e cun complement che si pues assimilâ a un predicatîf:  lûcs solitaris, lûcs di meditâ, / formin par un poete / un complès che lu inspire e lu dilete (Pieri Çorut, Primevere a Cividât); i Ladins e stan in mieç a la vite pulitiche e a formin ogjet di discussions animadis fra Todescs e Talians (Achil Telin, La Patrie Ladine, I, 1)
   Sin. jessi¹ , costituî , rapresentâ