Dizionari de Lenghe Furlane

barache  /-rà-/  ba|ra|che  [FO]

1. s.f. costruzion fate di materiâl grês e puar, doprade tant che magazen o ancje tant che cjase misare, soredut par tignî a durmî lavoradôrs, soldâts, presonîrs o puare int:  la barache dai imprescj; tai comuns taramotâts a forin tiradis sù, cuasi simpri dongje dai paîs distruts, une desene di "baracopolis" fatis di cjasis prefabricadis e barachis (Luigina Di Giusto, Andrea Guaran, Mauro Pascolini, La culine furlane); o ai trê fruts e l'om ducj intun grum, intune barache dulà che al plûf pardut (Pieri Somede dai Marcs, Cjase di fitâ); il lager al è un sierai cu la filiade ator ator e dentri cu lis barachis dai presonîrs (Ivano Urli, Storie di Min)
   Sin. cjason , scarabere , caboite , cabôt , taboghe , carabere
   
   1. int o robe che e je a stâ dentri di une barache:  la barache e je sbarlufide, si sfreolisi i voi pe improvisade, cualchidun si spaurìs, cualchidun al ostee, o pûr lu consee "Platilu, nascondilo, nascondilo, Vito!" (Ivano Urli, Storie di Min)
2. s.f. cjase une vore malsestade:  a son a stâ tune barache di cjase, frede di Invier e cjaldone di Istât
   Sin. scrosop , scrusup , taboghe , casope
3. s.f. tai marcjâts, puest li che si vent e si compre:  in bande nome i colaçârs cu lis lôr barachis di angurie o di mandolât (Riedo Pup, I furlans e lis sagris); i fantats invezit lant a messe grande a compravin su la barache in place nolis miestiis, bagjigjis e coculis (Pieri Menis, I siops); Jacum tai paîs dongje, nol mancjave mai par vie che la sô barache e faseve colôr e la int lu viodeve vulintîr (Angelo Covazzi, Fradi dal plevan)
   Sin. barachin
4. s.f. (coloc., fig.) imprese o ativitât economiche:  cussì o viodarês cui vuestris voi ce che e reone la barache (Carlo Sgorlon, Prime di sere)
5. s.f. famee, soredut tant che grup di personis che a àn di cjatâ avonde bêçs par vivi:  ma la sô no jere avarizie, si ben une necessitât dai timps e soredut, par lui, une robe naturâl, abituât come che al jere a mangjâ a cjase polente e lidric, e fûr doi centesims di pan e cinc di vin, par podê tirâ indenant la barache de famee (Pieri Menis, Gno nono); e veve cuatri fruts e nome i doi braçs dal so om, che al faseve il manoâl, par parâ indenant la barache (Roberto Ongaro, Cretevierte)
   Sin. barcje
6. s.f. fieste:  lâ a fâ barache cui amîs
   Sin. fraie
7. s.f. situazion confusionarie:  une reson par che gjenitôrs insegnants e dirigjents scolastics a refudassin la lenghe furlane cause di tante barache (Adrian Cescje, Memoriis di politiche linguistiche); se no si fâs alc, ca al va a finî dut in barache
   Sin. confusion , mismàs , casin , berdei , gredei
8. s.f. (fig., spres.) ent statâl o parastatâl che nol è produtîf:  si trate simpri di une barache cussì complicade, cussì pesante, viere e mâl dade dongje, che no podarès mai rispuindi aes dibisugnis de nazion (Josef Marchet, La scrassigne)
   Sin. baracon
9. s.f. (volg.) femine che e vent prestazions sessuâls, o di pocje moralitât, massime tant che ofese:  a someavin fûr di cjâf pe rabie, e le clamavin strie, civuite, barache, svualdrine (Carlo Sgorlon, Ombris tal infinît)
   Sin. piore , svualdrine , putane , scrove , svualde , femenate , troie
10. s.f. [BF] (ancje scherç.) persone pôc oneste
    Sin. ligjere , birbant , barabe

Polirematichis e espressions idiomatichis

• mandâ indenant la barache loc.v.
• mandâ indevant la barache loc.v.
• parâ indenant la barache loc.v.
• parâ indevant la barache loc.v.
• tignî sù la barache loc.v.
• tirâ indenant la barache loc.v.
• tirâ indevant la barache loc.v.
• voltâ barache loc.v.