Dizionari de Lenghe Furlane

mai¹ mai [FO]

av., inter. in nissun moment, nissune volte, in nissun timp, in nissun câs: nol à mai fat mâl a une moscje (Pieri Menis, Agnul Baraçut); Fausto Schiavi al à lassade une olme che no si è mai sfantade e, fin che al sarà vîf cualchidun di noaltris, no si sfantarà mai (Adrian Cescje, Tal non di Fausto Schiavi); come Quilin, che nol à mai metût pît in glesie parcè che al diseve che lui al voleve vê dafâ cul Paron, no cui fatôrs (Riedo Pup, I furlans e la religjon); a vevin insegnât a la lôr int a no molâ mai (Angelo Floramo, Cuintristorie dal Nûfcent 2000-2010); di cjoc che o sedi, jo no piert mai i sintiments (Riedo Pup, L'armistizi dal '16)
1. (iperb.) par dâ plui enfasi a une negazion: ongulis neris di morcje e un sotfont di odôr di vueli e di benzine che nol leve mai vie (Antescûr, Il svol dal Falcone)
2. considerant dutis lis voltis, dut il timp passât: un dai miôr films in lenghe basche che al sedi mai stât metût adun (Fabian Ros, Loreak, flôrs e cinise)
3. in interogativis, za une cualchi volte: isal mai stât in France, Cjapitani? (Carlo Sgorlon, Il dolfin)
av. in espressions interogativis, spec. in domandis retorichis, esclamativis, di comant o di esortazion, par dâ plui enfasi: «Po, Batiste, ce disêso mai cumò?» (Pieri Menis, Un muart su la strade); lu coionave parcè che chel frut al jere grues: no lu vessial mai fat! Chel i jere saltât intor metintji lis mans ator dal cuel! (Checo Tam, I nemîs); ah, puar mai me (Spirt Anonim, La procession); "Cjale, Tunin, noaltris pudìn scjavaçâ par culì […]" "Nancje par ideis; jo no vegni pai trois!" "Rivìn prime a cjase, mat che tu sês!" "Oh, no no! Vait mai bessôi!" (Dolfo Zorzut, El mago Sabin)
av. cun valôr concessîf: cuant che jo o savès di podê vê une sperance, mai une piçule sperance, o cjaperès il coragjo a cuatri mans e… (Bepo Marion, Il canocjâl de contesse)
Sin. ancje , pûr¹ , si ben , se pûr , pûr se

Polirematichis e espressions idiomatichis

che mai loc.adi.inv.
che mai ce loc.adi.inv.
cui sa mai loc.av.
cuissà mai loc.av.
dopo mai loc.av.
mai altri loc.av., loc.inter.
mai che loc.coniun.
mai e mai altri loc.av., loc.inter.
mai miei loc.av., loc.inter.
mai miôr loc.av., loc.inter.
mai plui loc.av., loc.inter.
mai plui e mai altri loc.av., loc.inter.
mai tant ben loc.av., loc.inter.
mancjàs mai che loc.coniun.
mancje mai loc.av.
mancje mai che loc.coniun.
plui che mai loc.v.
plui di mai loc.v.
se mai loc.coniun., loc.av.
tant ben che mai loc.av., loc.inter.
tant che mai loc.av., loc.adi.inv.
tant che mai ce loc.av., loc.adi.inv.

Proverbis:

a pensâ mâl, no si fale mai
a tratâ ben no si fale mai
a tratâ cun buinegracie no si fale mai
a tratâ cun creance no si fale mai
a Trave e Vinai, a Lauc e Davai, un galantom no si cjate mai
a ubidî no si fale mai
a un lari in cjase no si siere mai
ai laris di cjase no si siere mai
amôr nol è mai vieri
avâr agricultôr, no si è mai fat siôr
ce che si brame nol ven mai
cite rote no mûr mai
cjar in mostre no si compre mai
cjaval, cjan, femine e sclope no si imprestiju mai
cuant che a fasin mâl i cai, la aghe no mancje mai
cuant che si dîs fasarai, si è sigûrs di no fâ mai
cui che al è l'ultin nol è mai di prin
cui che al è mat nol vuarìs mai e se al vuarìs al è fortunât assai
cui che al fâs il to mistîr no ti è mai amì
cui che al scolte nol à mai tuart, cui che al fevele al po simpri falâ
cui che al va daûr plume mai nol ingrume
dal bon timp e de buine int no si stufisi mai
dal bon timp no si stufisi mai
dal pan no si stufisi mai
di une brute scarpe no vignarà mai fûr une biele çavate
e treme la code dal mus, ma no cole mai
fasarai al è fradi di no fâ mai
gjoldi simpri fin che si po, no i mancje mai timp al patî
i gjenitôrs no vuelin viodi mai i difiets de lôr prole
il ben nol è mai trop
il contadin nol à mai fin
il contadin nol à mai padin
il mâl che si vuelisi di bessôi nol è mai masse
il mâl che si vûl nol è mai di masse
il mâl nol è mai tant grant che si lu fâs
il marcjadant nol sta mai bessôl
il marcjadant nol sta mai sôl
il pecjât nol sta mai scuindût
il piruç nol cole mai lontan dal piruçâr
il pôc nol fâs mai mâl
il prin amôr nol scjampe mai dal cûr
il puar om nol à mai ben: se i mûr la vacje i vanze il fen, se la vacje e campe il fen i mancje
il savi nol è mai sôl
il Signôr no i vûl mai mâl a ducj
il Signôr nol vûl mai nissun di content
il test di Bertolt nol fale mai: cuant che al plûf lui al rît e cuant che al è soreli al vai
il timp che si piert no si lu cuiste mai
il tuart nol è mai dut di une bande
il vuadagn nol stufe mai
inte robe zovine no si piert mai
la aghe no piert mai i siei dirits
la bausie no sta mai scuindude
la bolp e mude il pêl ma il vizi mai
la bolp no fâs mai mâl là che e à la tane
la buine robe no je mai cjare
la cjar che e mene no sta mai ferme
la cjase che a fâs caritât no larà mai in malore
la cjase dai contents no je stade mai cuvierte
la femine e à il cûr a fetis e, se lis da, no son mai netis
la galere e la preson no fâs mai nissun di bon
la muart no vûl vê mai tuart
la preson no fâs mai nissun di bon
la tampieste no puarte mai cjaristie ma puar chel che i tocje
la tegne no i ven mai a di un sôl cjâf
la tegne no nas mai di un sôl cjâf
lavorâ come che no si ves di murî mai, vivi come che si ves di murî simpri
lis botis no colin mai dutis intune volte
lis disgraciis no van mai solis
mai bandonâ il ciert pal inciert
mai bandonâ la strade viere par chê gnove
mai dî mai
mai fâ mâl cu la sperance di vê ben
mai laudâ il biel dì prin di sere
mai mangjâ i dêts par gole di cicin
mai mangjâ i piçs par voie di cjar
mai nadâ cuintri de corint
mai no si scomence mai no si finìs
mai no si taisi mai no si leisi
mâl di part mai nol part
mignestre riscjaldade no je mai buine
miôr dî puar mai me che no puars mai nô
miôr no vê mai vût che no vê pierdût
miôr tart che no mai
ni cuant che si maridisi ni cuant che si fâs batiâ no si è mai puars
ni il tentôr ni il muredôr nol vignarà mai siôr
ni la malatie ni la preson no àn mai fat un galantom
ni par baiâ di cjan ni par ronâ di mus nol è stât mai fermât il cors de lune
nissun nol è deventât mai puar par fâ caritât
no bisugne mai dî ce che no si sa di ciert
no bisugne mai fâ confronts
no bisugne mai infidâsi dai sants che a cjiin
no je mai fate la leç che pensât nol sei l'ingjan
no je mai spongje che no lassi scoladuris
no je mai stade ploie che il bontimp nol sei tornât
no je mai une disgracie che no sedi une fortune
no je mai vanzade cjar in becjarie che par lire o prionte no si dedi vie
no mai fâ un mûr se si viôt un clap cu la ponte infûr
no si à mai di lamentâsi di vuê parcè che doman al po jessi piês
no si à mai di nomenâ i agns des feminis
no si à mai un plasê che nol sedi un displasê
no si da mai la rassade se no je plene la mezine
no si è mai tant puars di no podê prometi
no si è mai viei par imparâ
no si file mai tant sutîl che il cjaveç nol salti fûr
no si pense mai a dutis lis peraulis che si dîs
no si sa mai avonde
no si spude mai tal plat che si mangje
no si taie mai l'arbul cuntun sôl colp
no si varès mai di disvuedâ il sac
no stâ crodiur mai a chei che a àn politiche sporcje
no stâ mai cjoli une gjate intun sac
no stâ mai dî tac fin che nol è tal sac
no stâ mai paiâ denant trat
no stâ mai pierdi il dumiesti pal salvadi
no tu ti pintirâs mai di vê fevelât pôc e mangjât pôc
no van mai dutis pes pensadis
nol è mai carnevâl che no sedi lune di Fevrâr
nol è mai fûc che nol scjaldi cualchidun
nol è mai muart gjoldi
nol è mai nassût l'agnelut che nol sedi nassût ancje il so sterput
nol è mai nemì tant vîl che no si vedi di temê
nol è mai piês che scugnî
nol è mai stât l'ultin di carnevâl che no sedi fate o par fâsi la lune di Fevrâr
nol è mai un brâf miedi fin che nol jemple il cimitieri
nol è mai un mâl che nol puarti un ben
nol è mai un mâl che nol sedi ancje un ben
nol è mai un mâl par un che par altris nol sedi un ben
nol è mai un svelt che nol sedi un plui svelt
nol mûr mai chel che al à fat la robe che nol sedi nassût chel che al à di mangjâle
nol pâr mai tant biel che a cjase so
nol sarà mai om cui che nol sa comandâsi
par fâ lis fotis nol è mai masse tart
pic pic, il taiepiere nol deventarà mai ric: finît di picâ, finît di mangjâ
predis e pastôrs no contentin mai ducj
robe dade mai tornade, cul curtìs insanganade
se al plûf Vinars Sant, la tiere no je mai sazie
tic tic tic, il muredôr nol vignarà mai ric
tic tic, il fari nol deventarà mai ric
un biel tasê nol fo mai scrit
une gjate no si sgrace mai sole