Dizionari de Lenghe Furlane

ingrumâ  in|gru|mâ  [FO]

1. v.tr. meti dongje une grande cuantitât di robis, elements, risorsis e v.i., o ancje personis:  un vint di tramontane che al ingrumave flocs di nêf in ducj i cjantons (Franca Mainardis, Un bosc cence colôrs); al cor sul puest dulà che il slac al à ingrumât la sô musse maledide (Maria Forte, La tiere di Lansing); pa la Vila i Todescs a corevin come sions e a ingrumavin la zent su la plaça (Novella Cantarutti, Il Crist sclagn)
   Sin. dâ dongje , intropâ , parâ di bande , parâ dongje , ramassâ , meti in tasse , racuei , rionzi , tirâ adun , tirâ dongje , zontâ
2. v.tr. butâ diviersis robis une su chê altre, di mût che a stedin insiemi, spec. in disordin:  e gjavà, ben planchin, la cotule, la gjachetine e la cotule sot e e ingrumà dut su la jerbe dal rivâl (Maria Forte, Mabile la Lunghine)
   Sin. intassâ , butâ sù , parâ sù
3. v.tr. (ancje ass.) meti di bande bêçs e ricjecis:  ce om gjenerôs no jerial stât siôr Toni, un om di cûr, […] ce che a vevin ingrumât i siei vons in centenârs di agns, lui al veve sparniçât tune sole vite e curte ancje chê (Alan Brusini, Come tai romançs); al jere stât come cjapât di une fiere di fâ, di sparagnâ e di ingrumâ (Maria Forte, La tiere di Lansing)
   Sin. meti di bande , meti in bande , sparagnâ , meti dongje , dâ dongje
   
   1. (fig.) rivâ a otignî, a vinci, a meretâ, spec. in grande cuantitât:  The Special Need, distribuît de Tucker Film, dopo di vê ingrumât vie pal 2014 une rieste impressionante di premis […] chest an al è stât ancje nomenât ai "Nastri d'Argento" (Fabian Ros, Gnovis cine)
4. v.tr. meti insiemi alc par tignîlu o parcè che al covente, ancje imateriâl:  un studiât, Pavle Merkù, che torzeonant par agns tes cjasis che a muerin sot des montagnis, al à ingrumât centenârs di documents etnografics (Celso Macôr, Jentrade a Sacheburache); nus cjalà intor smarît, un par un, par cjatâ comprension e confuart, par ingrumâ coragjo par cuant che sô mari e varès viodût il vistît gnûf ridot in chei stâts (Meni Ucel, La ombrene)
   Sin. dâ dongje , tirâ dongje , tirâ sù , meti dongje
   
   1. (fig.) ancje cun subiet che nol fâs une azion volontarie e riferît a robis che no coventin:  jo o ai simpri i stes bregons mimetics che a ingrumin cragne su cragne (Checo Tam, La maree nere)
5. v.tr. svicinâ, fâ stâ dongje in maniere espressive:  il vecjo al strenzeve e al smolave la bocje, al ingrumave lis grispis dal cerneli e jê lu cjalave (Maria Forte, La tiere di Lansing)
   Sin. ingrispâ
6. v.tr. (pop.) cjapâ cdn. cun intenzions sessuâls:  o soi scjampade tal assensôr, ma se al rivave a jentrâ sigûr che mi ingrumave
   
   1. dâ botis:  cor, va, e se o torni a vioditi di chestis bandis ti ingrumi
      Sin. fruçâ

Proverbis:

• cuant che si ingrumin lis feminis, si mude il timp
• cui che al ingrume nol done
• cui che al va daûr plume mai nol ingrume
• ingrume vuê, ingrume doman, si cjate alc insom dal an
• par ingrumâ bisugne striçâ