Dizionari de Lenghe Furlane

fresc¹  /-è-/  fresc  [FO]

1. adi. che al à temperadure avonde basse, cence rivâ a jessi frêt e podint ancje jessi plasevul:  al jere cuasi scûr te sere frescje di Setembar (Alan Brusini, Gian Paolo Linda, I forescj); l'aiar net, fresc, daspò di une gnot di burlaçs, la matine biele (Laurin Zuan Nardin, Cjantâ pe vile); la bire che e coreve jù frescje pal gargat (Pieri Menis, Une letare par Bepo)
2. s.m. temperadure avonde basse ma che e pues ancje jessi plasevule:  l'ultin toc di strade prin dal rocul al jere ombrenûl, e il so fresc mi à fat ben (Adrian Cescje, Memoriis di politiche linguistiche)
3. s.m. puest o cundizion dulà che la temperadure e je avonde basse, ma e pues fâ plasê:  chê zoventût se gjoldeve tor une taule ben furnide di grazie di Diu, culà al fresc sot une piargule di ue nere (Zuan Lurinçon, La Madalene); e une butilie di blanc, ise za in fresc? (Laurin Zuan Nardin, SIP); sentaitsi intant ca difûr al fresc sun chest scagnut (Luigi Gortani, Meni Fari)
4. s.m. di alc di mangjâ, a pene fat, prontât, metût in vendite, cence procediments di conservazion:  la Cinccent di Rino, che e procurave il pan fresc ogni buinore a dute la mularie (Cristina Noacco, Faliscjis); o stevi miôr sì, là sù, cui miei, in mieç des monts, a passon cu lis pioris, pan di siale, lat fresc, lat piât, aghe risultive (Pieri Somede dai Marcs, Lassait che mi sbrochi!); une fuiace di farine di sorc cuinçade cun spongje frescje (Pieri Menis, Chei di Muraie); se o cjolês un folp fresc, netaitlu de robe di dentri e conzelaitlu: in cheste maniere la cjar e sarà plui tenare (Sandri Carrozzo, Polbo á feira - Folp a la galiziane); lis comaris i puartavin cui un salam, cui un pôcs di ûfs frescs, cui un balet di spongje, cui une gjaline, cui un mezut di farine (Angelo Covazzi, Il miracul des panolis)
   Sin. gnûf , zovin
   
   1. di vegjetâl, no cuet:  jemplâ lis sportis cun verdure frescje e pomis di stagjon (Elena Zanussi, La gnove maniere di comprâ verdure in Friûl)
   2. di prodot che al pues jessi invecjât, che nol è stât stagjonât o che al è stât stagjonât par pôc timp:  il formadi fresc lu ai finût, al è restât chel di gratâ (Stiefin Morat, Donald dal Tiliment)
   3. ancje riferît a altris prodots, prontât di pôc:  tocje spietâ la buine stagjon pal cop e modon fresc de gnove anade (Ivano Urli, Storie di Min)
5. adi. di rosis, a pene viertis e ancjemò su la plante, o a pene cjoltis sù e no secjadis:  la balaustre plene di rosis frescjis (Pieri Menis, Chei di Muraie); e veve intorsi il plui biel vistît de fieste e une rose frescje tai cjavei (Dino Virgili, Il cûr te tiare)
6. adi., s.m. di vernîs, tinte, stabilidure e v.i., dade sù di pôc:  al veve une vecje Torpado mieze rusine e cu lis mantiis di cuar. Le veve pene piturade cuntun lavôr "a cjandele" ven a stâi al veve brusât la vernîs frescje fasint des riis (Milio dai cjans, La muart e Svualdin)
   Sin. resint
7. adi. resint, nassût, vignût, sucedût di pôc, o che al à a pene fat une cierte azion e v.i.:  voie di fermâsi par pognisi su la jerbe frescje e lassâ che il mont al vadi par so cont (Gianni Gregoricchio, Trê feminis); a àn cjapât il troi dal Fontanon par scurtâle, pescjant la nêf frescje colade vie pe gnot (Pieri Menis, Funerâl a Pâl Piçul); e jere in jê une voie frescje di doprâsi par une famee dute sô (Maria Forte, Cjase di Dalban); se moche […] convint di vê vût da fâ cuntun mat vignût fresc fresc di Sant Svualt (Arturo Feruglio, Viaç a Vignesie); masse grant il displasê, masse fonde la feride, masse fresc il fat (Roberto Ongaro, Cretevierte)
   Sin. crei , de ultime ore , di zornade , gnûf , gnûf resint , resint
8. adi. cun daspò la prep. "di", al pant une cundizion o azion a pene finide:  vin di lâ insiemi là di chê femine frescje di part, che no somee tant ben (Pieri Somede dai Marcs, Vilie di Nadâl (teatri)); la bataie pe costituzion de Universitât in Friûl, che e jere frescje di un grant sucès (Max Mauro, Un Friûl difarent: i 90 mhz di Onde Furlane); la Cjarte Costituzionâl de Republiche taliane, ancjemò frescje di ingjustri, e stabilìs un ordenament autonomistic pes regjons che a formin il Stât (Josef Marchet, …e la leç e je salve); cence savê si inacuarzè di cjareçâ chel mûr fresc di malte (Lucio Perès, Il mâl dal mûr)
9. adi. in fuarce, in salût, par vie di no jessi stât fruiât dal timp o di alc di brut:  musis zovinis cun bocje frescje e voi plens di lûs (Maria Forte, Cjase di Dalban); cuant che lu à menât dongje, [il mus] al jere dibot un puieri, fresc e vivarôs tant che l'arint vîf (Josef Marchet, Lis predicjis dal muini); cul passâ dai agns, si fasìn simpri plui debii, simpri plui smamîts, simpri plui flaps e la nestre piel frescje e devente come peleote (Checo Tam, I mîts di Babylonie); che l'amôr fresc che o vês vuê no us bandoni mai te vite (Francesc Placerean, Cuant che tal matrimoni al è l'amôr cristian, li al è verementri Diu)
   Sin. biel , florît , in flôr , in salût , prospar¹ , resint , rubest , san
10. adi. che al à lis bielis cualitâts di ce che al è gnûf:  chel aiarin imbombât di odôrs frescs e gnûfs (Meni Ucel, La "Fieste dai Roncs")
11. adi. di cdn., che al à ancjemò fuarcis, no strac:  Eliseo al le sù cence fature, par vie che al jere ancjemò fresc di fuarcis (Carlo Sgorlon, Prime di sere); mandâ reparts frescs sul front
    Sin. distracât , in forme , in fuarce , in salût , polsât , svelt
12. adi. naturâl, spontani, no artificiôs, no masse elaborât:  un mût di scrivi fresc e svelt
    Sin. spontani , vîf , vivarôs , gjenuin , naturâl
13. s.m. [TS] pit. strât di stabilidure no sut dal dut che si piture sore cun colôrs a aghe
    
    1. viôt afresc :  [la piture] invece di fâle a vueli, vês di fâle fâ a fresc (Giuseppe Ferdinando del Torre, Il contadinel. Lunari par l'an 1857); stanziis là che si sunave e che si zuiave, cui frescs dal Tintoretto e dal Tiepolo (Pierluigi Visintin, Friûl e furlans te Histoire de ma vie di Giacomo Casanova); e alçà i voi sui frescs de cube, e smirà la sante protetore (Jolanda Mazzon, Cungjò Friûl)
14. s.m. [TS] tess. tiessût lizêr di lane par vistiari estîf

Polirematichis e espressions idiomatichis

• a fresc loc.adi.inv., loc.av.
• di fresc loc.av.
• stâ fresc loc.v.

Proverbis:

• a cjaval vieli i plâs la jerbe frescje
• e vâl plui une rose frescje che no un scovul
• il pes al vûl fresc