Dizionari de Lenghe Furlane

fevelâ  fe|ve|lâ  [FO]

1. v.intr. doprâ la vôs, lis peraulis, par comunicâ:  al fevelave pôc ma nol diseve mai monadis e si capive a colp che al veve rumiade pulît la robe (Antoni Beline, Pre Pitin); intant che sô mari e fevelave, Laurinç le scoltave cidin (Agnul di Spere, I prâts des Savodagnis)
   Sin. resonâ , tabaiâ , cjacarâ
   Var. parlâ , favelâ
   
   1. v.tr. fâ savê ce che si pense:  i inglês a àn bielzà fevelât clâr e net che i lôr rapuarts cui stâts dal Commonwealth fûr da la Europe a son plui strents e plui impuartants che no i leams che a puedin vê cui popui di Europe (Josef Marchet, Federazion europee tra nazions o tra regjons?)
      Sin. dî
   2. fâ valê ce che si pense:  jo no ai autoritât di fevelâ, e no fevelarai altri, nancje une peraule (Josef Marchet, Lis predicjis dal muini)
   3. fâ un discors formâl o uficiâl:  i gjornâi a vevin scrit che intant che al fevelave Mussolini a Udin, une acuile si jere poiade su la specule dal cjistiel (Alan Brusini, Come tai romançs)
   4. confrontâ lis ideis cun cdn.:  o ai bisugne di fevelâ cul segretari e di viodi la leç (Pieri Somede dai Marcs, La ultime firme de mê podestarie)
   5. tratâ, metisi in cunvigne par un afâr, un lavôr, un servizi e v.i.:  o ai fevelât cul marangon par che al meti jù il solâr dal mezât (Maria Forte, La tiere di Lansing)
2. v.tr., v.intr. doprâ o savê doprâ un ciert idiome par comunicâ:  i domandà a Laurinç se al fevelave par câs une des lenghis de Jugoslavie (Agnul di Spere, In viaç di domenie); i conseîrs comunâi a puedin fevelâ in lenghe furlane vie pes ativitâts dal consei e des comissions (Aministrazion Publiche, Statût dal Comun di Udin); in dì di vuê, il numar di personis che a fevelin par galês al è tornât a cressi (Carli Pup, Teritoris - Oms di Libertât)
   Sin. tabaiâ , cjacarâ
3. v.intr., v.tr. passâ il timp in conversazion:  siore Madalene, co ju cjatave cun cuadri e pinel in man, si fermave a fevelâ cui pitôrs (Alan Brusini, Come tai romançs); al jere tart e ancjemò la int dal paîs in chê sere e fevelave a troputs sot dai puartis (Pieri Menis, Si disarès che e je inventade); in cjase ciertis robis no si podeve fevelâlis, se no dute la borgade lu saveve (Pieri Menis, Pascute)
   Sin. conversâ , discori , babâ , tabaiâ , cjacarâ
   
   1. v.intr., v.tr. contâ robis personâls di altris, spec. cuntune ponte di tristerie:  ma di cui no fevelavino chês feminis? E po, a podevin ben fevelâ: none e jere la miôr femine dal mont (Pieri Menis, Il cuader de none); in chê citât foreste […] nissun podeve fevelâle (Alan Brusini, Il svindic di Rosute)
      Sin. peteçâ , vê par lenghe
4. v.intr. frontâ un ciert teme, cun coments esplicazions e v.i.:  o vin tacât a fevelâ di Statût speciâl cuant che o vin viodût cemût che si stave cuinçant la mignestre a Rome (Josef Marchet, Par intindisi); fevelâ sù pai dêts
   Sin. resonâ , tabaiâ , discori , cjacarâ
   
   1. frontâ un teme no dome a vôs, ma ancje par scrit o in altris manieris:  si celebrave un procès impuartant, di chei che a fevelavin i gjornâi (Carlo Sgorlon, Ombris tal infinît)
5. v.intr. fâsi capî, ancje cence doprâ il lengaç verbâl:  Tilde i strenzè une man in zito, ma i voi lusignants a fevelavin par jê (Gianni Gregoricchio, Trê feminis)
6. v.intr. fâ savê informazions ancje segretis:  guai a ti, se tu fevelis cun cualchidun! - e tacà di brut. - Se tu pandis alc, no tu varâs vonde voi par vaî (Gianni Gregoricchio, Trê feminis)
   Sin. cjacarâ , confessâ , pandi , scuacarâ , spiâ , tabaiâ , spampanâ
7. v.intr. (coloc.) jessi in rapuart, dâ confidence:  nol fevelave cun nissun, nancje il bundì, che intun paîs al è il plui grâf dai pecjâts mortâi, che no 'nd è infier che al sbrovi avonde par un zigainar che nol salude (Antescûr, L'om misteriôs)
   
   1. morosâ:  la Taresine si maridà prime di dutis. Par un an e veve fevelât cul fi dal fornâr, cun Berto, po lui al veve volût fâle curte (Maria Forte, La fie çuete)
      Sin. fâ l'amôr , lâ par cjase , morosâ
8. v.intr. dâ une fonde sigure, une prove:  no je une strambe fantasie: e je une realtât za ben inviade. I documents a fevelin (Riedo Pup, Murî di fam cui camarins plens)
   Sin. cjantâ
9. v.intr. (fig.) ancje di robis inanimadis, fâ capî o fâ pensâ alc:  tacant dal sufit di trâfs fin al paviment di salîs, dut i veve fevelât di miserie (Franca Mainardis, Grivôr); dut al è lât pierdût o distrut. Par chest a Buie nol è un clap che nus feveli dal passât (Pieri Menis, Lis leiendis di Buie)
   Sin. contâ , cjacarâ
   
   1. fâ sintî la proprie impuartance:  al passave par om just, ancje se il so cûr al taseve cuant che a fevelavin i bêçs (Maria Forte, La tiere di Lansing)
10. s.m. azion dal comunicâ cu la vôs:  al era strent tal fevelâ e a nal faseva tela cun nissun (Novella Cantarutti, Il Crist sclagn)
    
    1. discors e mût di discori:  a jerin fevelâs inmò di sperance, di fidance (Dino Virgili, La aghe da pît la cleve)
    2. lengaç specific e mût di doprâlu, di pronunziâlu e v.i.:  dal fevelâ no someavin int di chenci (Pieri Somede dai Marcs, Gnot clare gnot scure); cuant che un popul al va indenant, il so fevelâ si svilupe, si distire, si articole, si perfezione (Josef Marchet, Un element fondamentâl dal moviment autonomistic)
       Sin. lenghe , lengaç , idiome

Polirematichis e espressions idiomatichis

• fevelant di cocis loc.inter.
• nancje fevelâ loc.inter.

Proverbis:

• al è bon no chel che al fevele ben ma chel che lu fâs
• altri al è fevelâ di muart, altri al è il murî
• ce che tu âs di fevelâ usgnot, fevele doman
• cuant che a fevele la fuarce, a tâs la reson
• cuant che i fruts a fevelin, i grancj a àn za biel fevelât
• cuant che i piçui a fevelin, i grancj e àn fevelât
• cui che al à il plui biel tasê, plui al fevele
• cui che al fevele al semene, cui che al tâs al racuei
• cui che al fevele trop, al pense pôc
• cui che al scolte nol à mai tuart, cui che al fevele al po simpri falâ
• cul fevelâ si intindisi
• cun cui che al à la gose, no fevelâ di gose
• daûr lis cisis e i mûrs no stâ fevelâ
• ducj a fevelin ben dal lôr mistîr
• dulà che si passe la etât biele ogni piere a fevele
• e je miôr figure a tasê che no a fevelâ
• fevele pôc e ben
• i muts a fevelin a mots
• il bevon al fevele simpri di vin
• il fevelâ pulît nol scortee la lenghe
• in cjase dai picjâts no si à di fevelâ di cuarde
• la lenghe e je fate par fevelâ
• la necessitât e insegne a fevelâ
• miôr mangjâ cuntun vuarp che no fevelâ cuntun sort
• no stâ fevelâ se no tu sês clamât e tu sarâs stimât
• no tu ti pintirâs mai di vê fevelât pôc e mangjât pôc
• tal cjoc al è il vin che al fevele