Dizionari de Lenghe Furlane

cjacarâ  cja|ca|râ  [FO]

1. v.intr. fevelâ dal plui e dal mancul, soredut cence masse impegn:  po a rivarin alì altris alpins dal borc par cjacarâ insiemi, e par bevi la tace in compagnie (Maria Forte, Cjase di Dalban); a saressin lâts tal barut a buinore, a varessin scomençade la zornade cuntun cafetut bevût cjacarant cun int no viodude di mês, di agns (Agnul di Spere, Vivi a Codroip); dome di une robe al veve bisugne e di chê nol podeve propit fâ di mancul: podê fevelâ, podê cjacarâ cun cualchidun di cualsisei robe, podê sintî chei altris, e sintîsi (Franca Mainardis, Aiar di cjase)
   Sin. babâ , badaiâ , badascolâ , bardelâ , conversâ , craçolâ , discori , fevelâ , peteçâ , resonâ , 'sabaiâ , sbaiafâ , tabaiuçâ , trabascjâ , tratâ , zornâ , tabaiâ
2. v.intr. fevelâ dai afârs di chei altris:  a cjacarin avonde par dut Rivuinis! Par vie che o partîs in trê. I Batistons, a disin, cun cjasis e braidis e nemâi… Ce ur covential ai Batistons? (Dino Virgili, La aghe da pît la cleve); za sul lavôr a començavin a cjacarâ. Cualchidun al diseve che Mary lu cjalave masse, che dispès si cjatavin insiemi (Pieri Menis, Sul agâr); jo o soi in dovê di prevignî il plevan prime che il scandul si slargji e prin che dut il paîs al cjacari (Costantino Smaniotto, Co l'amôr al cimie)
   Sin. peçotâ , peteçâ , slengotâ , tabaiâ
   
   1. v.tr. fevelâ daûr di cdn.:  la Riche, che e à une sglonfe di chês di sintî a dî che a van ator cjacarantle, i domande a Feo, cui voi difûr, cuant che a àn dit mâl di jê, e dulà (Meni Ucel, Maldicencis)
3. v.intr. in gjenerâl, esprimisi a vôs, cun dutis lis acezions di "fevelâ":  lui al cjacare in dificil, forsit par confondimi, ma jo cun lui o vuei jessi rût e sclet par no fâlu nancje pierdi timp (Tarcisio Venuti, La cjase di Toni); par savê alc di plui si veve di cjacarà cui parons de cjase dulà che e jere la piture, cun cualchi persone dal paîs, o dal borc (Dario Chialchia, Diari di un progjet didatic: etnografie par furlan te scuele); Laura e veve cualchi dificoltât tal fevelâ, passâts i doi agns che no cjacarave ancjemò (Mario Beltramini, Jo e Graziella); viôt cemût che tu cjacaris, supierbeose di une estrosate (Pieri Piçul, Vieri e gnûf)
   Sin. fevelâ , tabaiâ
4. v.intr., v.tr. doprâ une cierte lenghe:  il todesc lu à studiât a scuele e lu sa cjacarâ (Ivano Urli, Storie di Vera); dal 1911 a cjacaravin galês 977.366 personis, il 43,5% de popolazion dal Gales (Xavier Lamuela, Une riflession su lis politichis linguistichis)
   Sin. tabaiâ , fevelâ
5. v.intr. frontâ un argoment, no dome a vôs, ma ancje tun scrit o par television, par radio e v.i.:  lis risorsis sparagnadis a vegnin invistidis in progjets di solidarietât e di cooperazion: tal belanç si cjacare alore di invistiments etics, di invistiments sul stîl di vite e di invistiments solidaris (Buteghe dal Mont, Luche Nazzi, Guide par un consum just e solidâl); pe cosmologjie cuantistiche cjacarâ de fisiche de "fin dai timps" nol è - in linie di principi - lafè plui dificil di cjacarâ de "origjin dai timps" (Sergio Cecotti, Teologjie algjebriche)
   Sin. resonâ , tabaiâ , tirâ fûr , tocjâ , fevelâ
6. v.intr. (fig.) fâ capî ancje cence doprâ il lengaç verbâl:  mi à dât une cjalade che e cjacarave bessole; mi cjale cui voi che a cjacarin (Stefano Gasti, Il timp di balâ)
   Sin. tabaiâ , fevelâ
7. v.intr. (fig.) di reperts, provis, elements che si puedin osservâ e v.i., fâ capî, dâ une testemoneance concrete:  ce che nus reste ator pal Friûl, massime i monuments paleocristians, dal V al VII secul, no nus cjacare dome de difusion simpri plui largje dal cristianisim, ma ancje de profonde trasformazion di dute la vite sociâl e economiche (Gian Carlo Menis, Storie dal popul furlan); tes voris plui resintis si zonte un element che al cjacare ancjemò di plui de energjie vitâl de nature: il zermuei (Erika Adami, I segrets de vite tun zermuei di tiere di cjamp)
   Sin. fevelâ , tabaiâ
8. v.intr. (coloc.) di dôs personis, viodisi par un interès sentimentâl, ancje cence vê definît ancjemò un rapuart:  "Ma chei doi li, che si intindin cussì ben, sono insiemi?" "Mah, disìn che a cjacarin…"
   Sin. fâ l'amôr , lâ par cjase , morosâ , fevelâ , tabaiâ
   
   1. jessi insiemi, jessi morôs:  a àn cjacarât par cinc agns e dopo a àn decidût di meti sù cjase

Proverbis:

• cjacarâ cence pensâ al è come trai cence smicjâ
• cualchi volte cui che al à il plui biel tasê, al cjacare
• cui che al cjacare pôc al fâs buine figure cun metât di savê
• tant savê al è un grant merit, tant cjacarâ al è un grant difiet