Dizionari de Lenghe Furlane

discori  /-ò-/  dis|co|ri  [FO]

1. v.intr. comunicâ doprant la vôs, spec. tratant un argoment, fevelant cuntun ciert ordin e presentant ideis:  cu la morose, al veve discorût di fâ famee, di vê fruts, di meti sù cjase (Roberto Ongaro, Il muc); si po doprâ la lenghe tant par fevelâ che nome par tabaiâ tant par discori che nome par cjacarâ, tant par resonâ che nome par cuistionâ (Riedo Pup, I furlans e il fevelâ)
   Sin. fevelâ , cjacarâ , resonâ
   
   1. v.intr., v.tr. esaminâ un argoment, soredut scrutinant aspiets positîfs e negatîfs:  chê propueste di leç regjonâl par memoreâ la "Fieste de Patrie dal Friûl" […] in curt si varès di discorile e di fâle buine (Marc Stolf, La Patrie, la Fieste e la propueste di leç regjonâl)
      Sin. frontâ , discuti
2. v.intr. comunicâ cun cdn. doprant la vôs, o in câs ancje par scrit, in sens gjeneric o cun variazions di significât che si capissin dal contest:  e ven duncje fûr su la puarte la Eline, e li a tachin a discori dal plui e dal mancul, impins, sul antîl (Meni Ucel, Prioritâts); a tignî a batiâ a àn clamât copari Jacum e nol ocor discori che a àn fate une fiestone (Angelo Covazzi, Il fioç svilupât); no jere la Americhe che al veve sintût discori: scjafoiaç dì e gnot, bestiis stomeosis par ogni cjanton e po la int dal lûc che e cjalave di stos parcè che i emigrants a jerin "mussiùs", forescj (Lucio Perès, Il mâl dal mûr); chel operari al jere sui cuarante e no i displaseve discori, e si lavorave lis peraulis dut a so mût, une par une, e ognune e pandeve la sô çocje sardegnole (Agnul di Spere, Fieste di inaugurazion)
   Sin. baratâ la peraule , butâ la peraule , cjacarâ , fevelâ , resonâ , tabaiâ , dî , conversâ , fâ conversazion , contâ , discuti
3. s.m. esposizion resonade di un argoment, o ancje dome at di fevelâ:  il gno discori al abrace une visuâl che e supere i confins e lis diferencis dai umign (Tarcisio Venuti, La cjase di Toni)
   Sin. discors , resonament , resonade , fevelade , cjacarade , tabaiade
4. v.intr., s.m. (fig.) ancje di bestiis, plantis o elements inanimâts, fâ un sunsûr come di fevelâ:  la Roie e sclocjave difûr, tun discori cence padin di aghe sbaciade tai ingredeis des ruedis e tal zîr dai mulignei (Maria Forte, Cjase di Dalban); no si sintive a craçolâ la metraie ni a bruntulâ il canon, nome dì e gnot il discori misteriôs e sutîl des plantis altis, sofladis dal aiarin (Pieri Menis, Cemût che o soi restât caporâl)
   Sin. fevelâ , cjacarâ , tabaiâ , cisicâ , murmuiâ , discuti

Polirematichis e espressions idiomatichis

• e vie discorint loc.
• nancje discori loc.inter.

Proverbis:

• no si discor che la vacje no tiri ma al è rot l'argagn