Dizionari de Lenghe Furlane

discors  /-ò-/  dis|cors  [FO]

1. s.m. esposizion di une idee, di un pinsîr, par mieç de peraule:  al veve tacât cun so pari il discors sul lâ vie di cjase: al veve motivât che in Friûl al varès metût masse agns par metisi a puest (Agnul di Spere, I prâts des Savodagnis)
   Sin. discorude , plait , resonade , resonament , sproc¹ , fevelade
   Var. descors
   
   1. idee di fonde, logjiche o argoment plui interessant di une esposizion:  il discors al è che 2 milions di euros o ancje 20 pal belanç di une regjon a son un nuie e che invistîju ben, cun controi seris sui risultâts, te lenghe furlane al volarès dî invistîju te cressite civîl di un popul (Sandri Carrozzo, L'Antifurlan)
      Sin. pinsîr , logjiche , idee , resonament
   2. robe che si fevele:  za che o sin sul discors, o sarès seneôs di savê cui che al è chel brocul che al è lât a contâ a gno zinar che jo mi soi dissipade une man (Josef Marchet, Lis predicjis dal muini)
      Sin. argoment
2. s.m. esposizion di argoments, in gjenerâl in forme di monolic, fate in public, pal solit in ocasions uficiâls:  tal 1866 Garibaldi al è stât a Udin a fâ un discors dai siei. Tiere di confin il Friûl, e duncje fâ pratiche cu la sclope, tignîsi pronts e vie indenant di chest pas (Alan Brusini, Amîs come prime)
   Sin. plait
3. s.m. conversazion, fevelade tra dôs o plui personis:  e scoltave, invezit, i discors dal barbe Tite e di siôr Dalban e i pareve che il so spirt si vierzès dongje chei doi studiâts che a savevin cetantis robis (Maria Forte, Cjase di Dalban); il discors al colà sui Batistons, sul matrimoni di Guri e Nita (Dino Virgili, La aghe da pît la cleve); a vevin tant imbastît discors su chel fat [fâ une cjase gnove intun ciert puest], … ma Zuan nol veve cjapât chê idee (Maria Forte, La tiere di Lansing)
   Sin. colocui , conference , conversazion , partide di discors , resonade
4. s.m. let. dissertazion, tratazion, ancje tant che titul di opare:  Patanjali, un grant studiôs e miedi dal II secul daspò di Crist (p. di C.), inte sô opare principâl, I discors tor dal yoga (Yoga-sutra), al à dit che la meditazion e à come obietîf finâl chel di fermâ i pinsîrs (Franc Fari, Neurosiencis de meditazion)
   Sin. plait
5. s.m. (fig.) in sens une vore gjeneric, pal solit in espressions negativis, par rimarcâ une oposizion, une diference, il fat che alc nol jentre cun ce che si à dite fin ta chel moment e v.i.:  il furlan nol à mai odeât nissun. Al massim al po volê ben plui a di un che no a di un altri. Ma chest nol è un difiet e soredut al è un altri discors (Riedo Pup, I furlans e i talians)
   Sin. facende , storie , cuistion , robe
6. s.m. [TS] ling. enunziât che si davuelç in frasis leadis dal sens e di une intenzion di comunicazion unitarie:  la notazion dal discors si interesse di dutis chês notazions dopradis par marcâ dutis lis relazions e i elements che a van di là dai confins de frase (Vladimír Petkevič, trad. di Zorç Cadorin, Corpus linguistics)
7. s.m. [TS] mus. svilup di un teme, massime di gjenar melodic
8. s.m. (fig.) esposizion di contignûts, massime intune opare artistiche, ancje no a peraulis:  il riferiment judaic al è presint in dut il discors alegoric de aule Sud e al cjate une conferme in plui tal grant cuadri cu la stele di Davide, che e je te aule Nord (Giovanni Battauz, Flavio Cossar, Renato Iacumin, I mosaics de basiliche di Aquilee)

Polirematichis e espressions idiomatichis

• cambiâ discors loc.v.
• mudâ discors loc.v.
• sierâ il discors loc.v.
• tacâ discors loc.v.
• voltâ discors loc.v.