conference
/-rèn-/
con|fe|ren|ce
[FO]
-
s.f.
discors in public suntun ciert argoment:
si tache vinars ai 23 di Zenâr, cu la conference di pre Romano Michelot su pre Antoni Beline, un «predi eretic» (Erika Adami, «In file» cui eretics dal Friûl);
cheste vôs primordiâl e je scoltade cun partecipazion emotive fuarte di un public di dutis lis etâts e di dutis lis cundizions sociâls che ti ven daûr tes tôs leturis publichis, conferencis, presentazions (Walter Tomada, Pierluigi Cappello: «L’om plui concret? Il poete»);
chest lavôr, nassût dopo des conferencis tignudis dal prof. Iacumin sui mosaics di Aquilee a Romans tal mês di Otubar dal 2002, al vûl jessi un ricognossiment pai lavôrs di ricercje di chest studiôs aquileiês (Giovanni Battauz, Flavio Cossar, Renato Iacumin, I mosaics de basiliche di Aquilee)
Sin. comizi
, discors
Var. conferenzie
-
s.f.
riunion di plui personis par discuti tra di lôr suntun argoment:
a son scomençadis lis zornadis de conference internazionâl su lis minorancis, clamade dongje e organizade de Provincie di Triest pai 10, 11, 12, 13 e 14 di Lui [dal 1974] (Adrian Cescje, Memoriis di politiche linguistiche)
Sin. congrès
, simposi
-
s.f.
[TS]
polit.
orghin colegjâl nazionâl o internazionâl che al è delegât a regolâ rapuarts in cierts setôrs:
Tal 1975 e nas in maniere uficiâl la Conference pe Sigurece e pe Cooperazion in Europe (CSCE), che e à chê di jessi un «lûc di incuintri» tra i diviers Paîs dal continent, cu la funzion di vierzi il dialic tra Est e Ovest dilunc vie de Vuere Frede tai cjamps de sigurece militâr, de cooperazion economiche e dai dirits umans (Marc Stolf, Minorancis linguistichis)
-
s.f.
[TS]
ecl.
sentade periodiche dai vescui o dal clericât in gjenar:
la conference episcopâl taliane