Dizionari de Lenghe Furlane

cjantâ  cjan|tâ  [FO]

1. v.tr. fâ cu la vôs daûr di une musiche:  al capitave impreteribil in paîs, a bevi il taiut e a cjantâ cuatri vilotis in fraie (Josef Cjargnel, Lis aganis); mi sovegnin lis peraulis dolcis di mê ave, che te sô lenghe cjalde di un paîs lontan mi cjantave "nane, nane tu ninin" (Antescûr, Ninin)
   
   1. v.intr. produsi suns musicâi cu la vôs:  cjantâ a orele; al jere lât ator pal bosc par oris e oris cjantant a gole vierte e ducj si vevin fastidiâts (Enrico Martina, Ricuarts e inlusions); cjantâ di pet; Andree al restave cidin e jê e cjantave e i voleve ben (Agnul di Spere, La pueme cu la vôs biele); la ligrie tu le viodevis tai voi de int: tal saludâsi, tal fevelâ, tal cjantâ insiemi, tal morosâ dai zovins che si incuintravin dopo jespui (Riedo Pup, Tornìn a fâ fieste)
2. v.intr. fâ il cjantant di profession o par passion:  une famee dai Stope e leve a Vignesie par stâi daûr a une fie che e cjantave e là, che a jerin scuelis e teatris, si faseve cognossi (Alan Brusini, Come tai romançs)
3. v.intr., v.tr. di uciei, fâ i lôr viers, in gjenar melodiôs:  il prin gjal a cjantâ di buinore al jere simpri chel dai nestris viei (Pieri Menis, Il «trono» dal von); un svol i sghirlà fin dongje, une panole di peç i sfilà il cjapiel e un mierli i cjantà propit daûr (Maria Forte, La tiere di Lansing)
   Sin. bati , griâ , zornâ
   
   1. dal gri e v.i., fâ sunôr ma no cun orghins vocâi:  ce biel che al è vivi, cjalâ il cîl, sintî i grîs cjantâ e respirâ chest bon aiar fresc (Checo Tam, Cirî gnot); da puarte vierte al ven il rumôr de taviele e des cialis che a cjantin e il profum dal broili (Sandri Di Suald, Ah! la provincie)
      Sin. bati , griâ
   2. ancje di elements naturâi o altris robis, fâ un rumôr biel di sintî:  se o vignîs une dì sù par ca, o lin a sentâsi dongjelaltris sul rivâl grant dal Luri, in cueste di soreli, a sintî cemût che e cjante la aghe vive de mê tiere furlane. No ‘nd è aghe al mont che e cjanti cussì ben (Dino Virgili, La aghe da pît la cleve); intune grande stue di ghise, al cjantave un fûc di strissulis e di breis (Carlo Sgorlon, Prime di sere)
4. v.intr. di struments musicâi, sunâ cun dolcece e armonie:  la anime [dal violin rosean] e je spostade sot de tierce cuarde, par " fâle cjantâ miôr" (Alessio Screm, Cïtira e bünkula e la tradizion musicâl a Resie)
5. v.intr. esprimisi in maniere elegante, auliche, liriche e v.i.:  la poesie jevantsi a svolâ parsore il nivel usuâl de realtât ordenarie e stupide, e cjante in tiermins e formis che a cuistin significât e valôr e musicalitât gnovis (Josef Marchet, Un element fondamentâl dal moviment autonomistic)
   
   1. v.tr. descrivi in maniere liriche:  za il futurisim al cjantà l'amôr pe tecnologjie, a dî il vêr, plui pal prodot finît e il so ûs, che pe sience in se (Erika Adami, La tecnologjie e devente cjalde)
      Sin. celebrâ
6. v.intr. fâsi sintî dentri vie, jessi vîf tant che sensazion o rivoc interiôr:  mi cjante tal cûr la viere storie par latin di Pauli di Cividât: «… sù pes corints dal Tiliment e Ruvigne; sù par Osôf…» (Dino Virgili, La vilote dal Tiliment)
7. v.tr. pronunziâ in maniere ritmade o enfatiche o sim.:  e jere juste in prime la mestrine bionde che e cjantave lis silabis insiemi cui piçui (Dino Virgili, Emme come mamma)
8. v.intr., v.tr. (fig., ancje iron.) declarâ, dî o ripuartâ in maniere uficiâl o ordenade o forâl o sim.:  une pagjinute dal libri e cjante cussì: «Dalle rilevazioni dell'Istituto centrale di statistica si evince (biel ancje chest «evince») che [..]» (Riedo Pup, Lis feminis in caserme); ma jo o ai il testament che al cjante che mê sûr mi à lassade la robe a mi (Pieri Somede dai Marcs, Strambariis)
9. v.tr. dî in maniere agressive:  i cjantà clâr e net che cun sô gnece, al veve di disbratâsi di bessôl che, lui, in chei cantins nol voleve impaçâsi (Maria Forte, Cjase di Dalban)

Polirematichis e espressions idiomatichis

• cjantâlis v.pron.
• cjante o sivile loc.av., loc.inter.
• sunâlis e cjantâlis loc.v.

Proverbis:

• al cjante il gjal vie pe zornade, al è il diaul che al è par strade
• al è miôr il mierli che al cjante di bosc
• cjantâ no si po ben cuant che il stomi nol è plen
• cjantâ no si po ben se dal cûr nol ven
• cuant che a cjante la dordule, vint sigûr
• cuant che al cjante il ciuçau, il famei al mande il paron al diaul
• cuant che al cjante il ciuçau, il frêt al va a cjadaldiaul
• cuant che al cjante il crot, semene sorc
• cuant che al cjante il cuc su la rame nude, la panole a ven madure
• cuant che al cjante il cuc, al è ce fâ pardut, cuant che al lasse di cjantâ, in chê volte il grant dafâ
• cuant che al cjante il cuc, une dì ploie, une dì sut
• cuant che al cjante il furmiâr, cirît sotet pes bestiis e pal cjar
• cuant che dal cûr nol ven, cjantâ no si po ben
• cuant che e cjante la parussule, e cjante la zerpignole
• cuant che e cjante la rane, a ven la ploie
• cuant che il gjal al cjante la matine, la ploie e je vicine; cuant che al cjante la sere, bontimp si spere
• cuant che il gjal piçul al cjante, il grant al à za cjantât
• cuant che il gjal zovin al cjante, il vieli al à za cjantât
• cuant che la ciale a cjante, il forment al palombe
• cuant che la ciale e cjante di Setembar, cui che al compre blave al sta mâl a tornâle a vendi
• cuant che la gjaline e cjante, segn che e à fat l'ûf
• cuant che la rane e cjante, ploie sigure
• cuant che nol cjante il cuc pai tredis di Avrîl, bisugne lâ in comun a cirîlu
• cui che al cjante in taule e in jet al è un mat perfet
• cui che al puarte la crôs nol po cjantâ messe
• i bêçs dai predis a vegnin cjantant e a van vie sivilant
• in chê cjase che la gjaline e cjante e il gjal al tâs e je pocje pâs
• l'om al cjante cuant che al è plen e la bote cuant che e je vueide
• la cjarte e cjante
• la gjaline che a cjante e à fat l'ûf
• la gjaline e cjante co e à fat l'ûf
• lasse che e cjanti la ciale, tu fâs come la furmie
• no si po cjantâ e puartâ il sant
• no si po cjantâ e puartâ la crôs
• par che e vegni biele ue e biele blave a vuelin cjantadis lis implorazions de ciale
• par nuie il vuarp nol cjante
• plui si cjape, plui si cjante
• se il gjal al cjante daspò di misdì, il bontimp al è par finî
• se nol cjante ai siet o ai vot, o che al è muart o che al è cuot
• uciel pal aiar al cjante di ligrie, uciel in scjaipule al cjante di passion