Dizionari de Lenghe Furlane

ribaltâ  ri|bal|tâ  [AF]

1. v.tr. meti intune posizion contrarie di chê che e jere o di chê naturâl:  e veve fat dute la zornade i macarons, cuant che a jerin cuets i ai dit "Lasse che o ribalti jo la pignate par scolâju" (Mario Beltramini, Jo e Graziella); trê sotans e il fi dal colono, Fidrì, a lavorarin ribaltant dute le tiere (Pieri Menis, Sul agâr)
   Sin. voltâ , meti cui pîts insù , meti cul cûl insù , meti sotsore , rivoltâ , zirâ
   Cfr. disledrosâ , sledrosâ
2. v.tr. (fig.) fâ deventâ l'incontrari o fâ cambiâ une vore:  cjapât cussì di colp no i lave jù chê storie dal Concuardât che i faseve ribaltâ dutis lis ideis (Pieri Somede dai Marcs, 11 di Fevrâr 1929); une fase di tratament tecnologjic che […] e da plui risorsis par ribaltâ i fenomens di sostituzion linguistiche che a podaressin puartâlis a sparî (Sandri Carrozzo, Franz Feregot, La elaborazion di un corpus etichetât de lenghe furlane scrite: esperiments e prospetivis)
   Sin. rivoluzionâ , sledrosâ , trasformâ , disledrosâ , voltâ , rivoltâ , savoltâ
   
   1. fâ in maniere che alc nol deventi cemût che al jere previodût:  [Jacume] e à podût ribaltâi a Micjelon ducj i siei plans, e dutis lis arts par spossessâle di dut cuant e par sbandîle afat di cjase (Giovanni Gortani, Un gustâ diplomatic)
      Sin. strucjâ , fâ lâ strucj , fâ lâ sù pal stec , mandâ sù pal stec , fâ lâ in sbrui , mandâ in sbrui , savoltâ , rivoluzionâ , sledrosâ , disledrosâ
3. v.tr. meti in disordin:  cetancj dispiets che i fasevin […] i ribaltavin la vetrine, i puartavin vie la barete, o fasevin fente di scjampâ sence paiâ (Sergio Visentin, La scuele viere)
   Sin. rivoluzionâ , butâ par aiar , meti sotsore , savoltâ , rivoltâ
4. v.tr. (fig.) dâ fastidi, fâ une sensazion negative, fâ stâ mâl:  un odôr lisp che i ribaltà il stomi (Franco Marchetta, Madalene)
   Sin. voltâ , savoltâ , fâ zirâ , fâ voltâ , messedâ , rivoltâ
   
   1. meti in conturbie:  savoltât da la fiere dal savê, che i ribaltave il cûr e i faseve lusî i voi (Raffaele Serafini, Contis sot spirt); «Chest al è ben vêr, no ti varès robât se no», a lu confuarte jê smicjantlu intune maniere che i ribalte il sanc (Maurizio Mattiuzza, Al prossim casting ti sielzin te)
5. v.tr. fâ colâ alc o cdn.:  al butà il pac dai libris su la taule, e par un pêl nol ribaltà il vâs dal zucar (Carlo Sgorlon, Prime di sere); si tachin a scopulis, / si branchin pal cuel, / ribaltin lis taulis, / sucêt un pestel (Romeo Battistig (?), Ai Piombi); un grant scufiot che ti rive intune orele e cuasi ti ribalte de cjadree (Raffaele Serafini, Contis sot spirt)
   Sin. butâ jù , parâ jù , rivoltâ , sgjaventâ , strucjâ
   
   1. mudâ di puest, soredut di buride, di male maniere, a la svelte e v.i.:  e àn ribaltade dute la cusine / te cort, par dâ di blanc. E ce bordel (Enrico Fruch, Te cort)
      Sin. butâ , parâ
6. v.tr. (fig.) fâ colâ, fâ finî un podê, fâ cessâ une autoritât:  a ciraran aleancis par podê ribaltâ la maiorance (Riedo Pup, Strolic di Inviar)
   Sin. fâ colâ , butâ jù , parâ jù , savoltâ

Polirematichis e espressions idiomatichis

• ribaltâ il mont loc.v.
• ribaltâ il stomi loc.v.
• ribaltâ la anime loc.v.
• ribaltâ la fertaie loc.v.
• ribaltâsi il stomi loc.v.