Dizionari de Lenghe Furlane

rivoltâ  ri|vol|tâ  [CO]

1. v.tr. zirâ, cambiâ di posizion, orientament, direzion, viers e v.i., ancje di gnûf o plui voltis:  al vierç la buste e al volte e rivolte un sfueut (Pieri Somede dai Marcs, Vilie di Nadâl (teatri))
   Sin. disledrosâ , ribaltâ , rizirâ , sledrosâ , zirâ , voltâ
   Var. revoltâ , ravoltâ
   
   1. (fig.) fâ cambiâ di situazion, di cundizion, di indreçament, ancje cun autoritât o arbitrarietât, ancje plui voltis:  la burocrazie che e fâs fraidessi la nazion dentri vie, e cuiste simpri plui impuartance e plui autoritât; e devente simpri plui parone de situazion e le volte e le rivolte secontri che i torne cont (Josef Marchet, Debil il cerviel ma fuarte la gramule)
2. v.tr. [TS] sart. discusî e tornâ a cusî un vistît doprât, o sim., in maniere che la bande didentri e ledi parfûr e al somei mancul fruiât:  lu vevin simpri vistût rivoltant capos vieris che a jerin stâts di so pari o dai fradis plui grancj (Meni Ucel, La ombrene)
   Sin. voltâ
3. v.tr. (fig.) cirî di capî considerant sot di une altre prospetive:  divuardi a resonâ masse, divuardi a rivoltâ i tiermins! La «patrie» e je une cuistion di cûr e no di cerviel, di fede e no di reson: se si tire in bal il cerviel, al va dut in grum (Josef Marchet, La man e la arme)
4. v.tr. (fig.) butâ sot sore, fâ che alc al sedi in disordin
   Sin. rivoluzionâ , butâ par aiar , meti sotsore , savoltâ , ribaltâ
5. v.tr. (fig.) dâ fastidi, fâ une sensazion negative, fâ stâ mâl:  Mi à dât di bevi un losoç che mi à rivoltât il stomi (Meni Ucel, Credit)
   Sin. voltâ , savoltâ , fâ zirâ , fâ voltâ , messedâ , ribaltâ
6. v.tr. fâ colâ alc o cdn.
   Sin. butâ jù , parâ jù , sgjaventâ , strucjâ , ribaltâ