Dizionari de Lenghe Furlane

puar¹  /-ù-/  pu|ar  [FO]

1. adi., s.m. che, cui che al à pôcs mieçs par vivi o no 'nd à dal dut:  la int e pensave che la fam, pai puars, e fos une cundizion umane normâl e stabile. Che se no - se i puars a vessin mangjât vonde - ce puars saressino stâts! (Riedo Pup, I furlans e la fam); o vês cjapâts i miôr par voaltris e o vês lassât il scart pai puars sotans (Alviero Negro, Int di masnade); a san che o soi vedue e puare come il pedoli (Catarine Percude, La fuiace de Madone)
   Sin. bisugnôs , misar , miserevul
   Var. puôr , povar , pûr³ , pôr , puor
   Cfr. mendic , peçotâr , disgraciât , scuintiât
   
   1. che al mostre mancjance di bêçs e di benstâ:  i paisuts, cun chês puaris cjasis grisis, cui mûrs cence fregul di stabilidure, cui cuvierts di cops pesants e repeçâts a la miei cu sei (Josef Marchet, Il cjanâl vistût di blanc)
2. adi. di une comunitât, di un stât e v.i., cun pocje disponibilitât di risorsis:  sostignî i programs dal Unicef pai fruts dai Paîs plui puars dal mont (Erika Adami, A Tavagnà si jude il furlan)
   Sin. misar , sotsvilupât , indaûr
3. adi. che al à pocje cuantitât di alc:  un teren rubefat, decalcificât, plen di idrâts feroaluminics e puar di sostance organiche (Aministrazion Publiche, Pantianins - Torint Cuar)
   Sin. mancjant , misar , penuriôs
   
   1. (ancje ass.) de tiere, che e à pôc nudriment pes plantis:  pôi alts e secs, che a si distudin un dopo chel altri, par vie dal cjalt e de tiere puare de Tor (Cristina Noacco, Faliscjis)
4. adi. (fig.) di pôc valôr, di pocje fuarce, di pôc efiet e v.i.:  e sarès stade une leç avonde puare e gjeneriche, pôc impegnative sedi te normative che te part finanziarie (Adrian Cescje, Memoriis di politiche linguistiche)
   Sin. flap , lami , mauc , sclagn , sterp²
   
   1. (enf.) ancje par pandi modestie o false modestie:  butâ jù su chestis puaris cjartis, propit cumò, lis impressions nol è pussibil (Arturo Feruglio, Viaç a Vignesie)
5. adi., s.m. denant di un complement di limitazion, di cdn. che nol à cualitâts o virtûts che al varès di vê:  i sorestants furlans […] a àn memorie curte e sgrifis lungjis, a son masse siôrs di bêçs, masse puars di pinsîr (Sandri Carrozzo, Rotgaut e la politiche furlane langobarde)
6. adi., s.m. che, cui che al è intune cundizion di disgracie e gramece che e fâs dûl:  prin di dut al nestri puar popul furlan taramotât si à di lassâ la robe che al à, e no fâ fente di dâi, dopo di vêi cjolt lis risorsis che al à (Francesc Placerean, Il Friûl taramotât al à bisugne di ducj, ma al à di aministrâsi di bessôl); Madre Valeriana e tignive par man un puar frut disabil (Checo Tam, Il palaç); ma parcè po, Mariute, i dâstu in chê forme a chê puare creature? (Meni Ucel, Gjalinis)
   Sin. biadaç , biât , disgraciât , gram² , meschin , misar
   
   1. ancje in espressions esclamativis, par esprimi compassion, menace, pôre e sim.:  "Puôrs mai nû! A se che i sin vivûts! […] Ah Signour, distuda chês flamis che a mi brusin il cour!" (Pier Paolo Pasolini, I Turcs tal Friûl); "Puare jo, che o soi malade!" (Pieri Menis, Sot il puarti); o 'ndi vevi fate une di chês pelosis… Se la parone si jere visade, puar mai me! (Pieri Menis, La gjaline robade)
7. adi. che nol è plui in salût, che al è malmêtût o che nol funzione ben:  tirantsi sù pal pareman des scjalis o sentât sul jet al tirave la puare gjambe fin che i cricavin i gnerfs (Pieri Menis, Sul agâr); al è ridot a sterps chel puar cjamp (Maria Forte, Cjase di Dalban)
8. adi. che al à pocje inteligjence o pocje furbetât, ancje par rinfuarçâ altris adietîfs cul stes significât:  jo o soi un puar om cence letaris e cence scuele (Josef Marchet, Lis predicjis dal muini); cence chel puar svampît di 'Sefut, no jere fieste finide. Lu coionavin, lu menavin a ghirli, i fasevin dispiets, ma lui al restave alì cun lôr (Maria Forte, Chel svampît di 'Sefut)
   Sin. biât
9. adi. che al è muart:  a jerin vignûts difûr par lâ tal cimitieri, dopomisdì, a cjatâ i puars defonts, ven a stâi il puar nono e puare mê mari (Meni Ucel, Il telegram); se […] al fos stât vîf puar Pieri Çorut, ce biele poesie che al varès podût scrivi (Guido Antonioli, Florean dal Palaç, I, 1)
   Sin. biel , biât

Proverbis:

• a fâ caritât, no si devente puars
• al è miôr dî puar me che no puars nô
• al è miôr jessi puars e benvolûts che no princips e malvolûts
• al è miôr sei puar splantât che no princip mâl cjalât
• cuant che a son di maridâ nissun fantat al è puar, nissune fantate triste
• cuant che la siale e pent il spi, lu pent de bande dai puars
• dulà che no je femine il puar al patìs
• i fasûi a son la cjar dai puars
• il puar al à simpri tuart
• il puar al è nassût di une buiace
• il puar al è simpri puar
• il puar al mûr passût, il siôr di fam, il predi di frêt
• il puar content al è avonde ric
• il puar content al è siôr avonde
• il puar om nol à mai ben: se i mûr la vacje i vanze il fen, se la vacje e campe il fen i mancje
• il siôr al à i bêçs, il puar i comedons
• il siôr al mûr di fam e il puar massepassût
• il vin al è il lat dai puars viei
• la fortune dal puar a son i comedons
• la ore di gustâ pai siôrs e je cuant che a àn fam, pai puars cuant che a nd' àn
• la tampieste no puarte mai cjaristie ma puar chel che i tocje
• la tiere no vûl ni puars ni avârs
• la vacje dal puar e crepe e chê dal siôr ind fâs dôs
• lassimi puare, ti fasarai ric
• miôr dî puar mai me che no puars mai nô
• ni cuant che si maridisi ni cuant che si fâs batiâ no si è mai puars
• ni la pelagre al siôr ni la gote al pôr
• nissun fantat no si maride puar, nissune fantate triste
• nissun nol è deventât mai puar par fâ caritât
• no si è mai tant puars di no podê prometi
• ogni puar om, al sa lâ pal timp bon
• puar chel che si lasse vignî un pedoli
• puar chel om che si lasse gjavâ i bregons
• puar chel uciel che nol cognòs il gran
• puar cui che al servìs, ma puar ancje chel che al scuen fâsi servî
• puar il puar
• puar il puar e puar cui che nol à nissun
• puare chê femine che i fâs ogni gnot il jet a so marît
• puare chê surîs che e à nome une buse
• Sant Jacum e Filip, il puar al coione il ric
• se e à di crepâ, e crepe la vacje dal puar om
• se si fos induvinadôrs, no si sarès nissun puar in chest mont