Dizionari de Lenghe Furlane

parint  /-ì-/  pa|rint  [FO]

1. s.m. persone de stesse famee:  se tu vegnis par di là, ti presenti il gno om, i miei fîs e chei altris parincj (Carlo Sgorlon, Prime di sere); il dì de sagre cjase Muraie e jere simpri plene di parincj, di amîs, di fituâi, di vecjos fameis (Pieri Menis, Chei di Muraie); si sa che tra parincj lis rifis e i svindics ti àn plui savôr (Alan Brusini, Come tai romançs); no veve parincj strents, e nancje amîs cussì cjârs che a vessin podût judâle e confuartâle (Franca Mainardis, Il sium di Lissandri)
   Sin. familiâr
   Cfr. parintât , famee , pari , mari , fi¹ , fie , fradi , sûr¹ , barbe² , agne , nevôt , gnece , cusin , cusuvrin , nono , none , cugnât , cugnade , brût² , madone , zinar , missêr
   
   1. [TS] dir. cui che al à une relazion, di sanc o cuistade, cun altris membris di une famee o di altris fameis leadis par gjenealogjie, cun ducj i dirits e dovês che chê relazion e compuarte:  la stesse astension [in discussions e deliberazions che a tocjin interès personâi] e à di jessi cuant che al sedi interès di parincj o parincj par leç fintremai al cuart grât civîl (Aministrazion Publiche, Statût dal Comun di Udin)
2. s.m. (fig.) ce che si somee, che al à relazion cun alc altri:  ancje jê ur presentà la jote: ma une jote che no jere nancje parint di chê di done Catin: un brudiot cun pôcs fasûi, pocje coce, pôc lat (Luigi Gortani, La ospitalitât)
   Sin. fradi , cusin , sûr¹ , cusine²

Proverbis:

• al è plui vicin il dint che no il parint
• al vâl plui un amì che no cent parincj
• bogns i parincj, bogns i amîs, ma cuant che no 'nd è nuie a son ducj triscj
• cugnadis spadis, parincj sarpints
• i parincj si cognossiju a fassis, a gnocis e a cassis
• se a 'nd è al è parint di magari
• se si à voie di un displasê, si à di lâ ca dai parincj
• si spere plui dai amîs che no dai parincj