Dizionari de Lenghe Furlane

pari  pa|ri  [FO]

1. s.m. om che al à un fi, come altris nons di parintât se al à prime il possessîf nol à l'articul definît:  Jentrât in cjase, o soi lât adalt par saludâ mio pari (Pieri Somede dai Marcs, 11 di Fevrâr 1929); Gjovanin, invezit, al jere un timidut e si rindeve. Al veve la muse de mari, ma il pari al jere tal so caratar (Maria Forte, Mabile la Lunghine); ancje puar gno pari, di vieli, al jere deventât golôs tant che par solit a deventin golôs ducj i viei (Meni Ucel, Biscots)
   Sin. gjenitôr , pai , tate , papà , pupà
   Cfr. mari , famee , parint
2. s.m. om che si compuarte di mestri, di conseîr o che al à une cierte autoritât, che al jude, che al difint e v.i.:  [pa Radio Onde Furlane] Pagani […] in chei agns al veve un rûl cuasi di "bon pari": un pari di chei che a sberlin, si inrabiin pes strambetâts dai zovins, ma a lassin fâ (Max Mauro, Un Friûl difarent: i 90 mhz di Onde Furlane); il popul al tignive par Gjirardini che al jere clamât «il pari dai puars» (Riedo Pup, Il façolet dal Dacian)
3. s.m. tal pl., i oms des gjenerazions che a son vignudis prime:  nus àn insegnât che la sience des leçs e fo la plui grande virtût e prerogative dai nestris paris romans (Josef Marchet, L'esempli di adalt); un om just e religjôs, Tobie, si voltave ogni dì viers di Jerusalem, a sfogâ la sô anime cul Diu dai siei paris (Antoni Beline, Sant Jacum, là che al finìs il mont)
   Sin. von
4. s.m. [TS] religj. intes religjons e inte mitologjie, il diu plui alt, tant che creadôr:  o viodarês che o lais in Paradîs a la diestre di Diu Pari (Andreina Nicoloso Ciceri, La cjavre - Racconti popolari friulani I); Zeus pari di oms e gjôs
   
   1. cu la iniz. maiusc., te religjon cristiane une des trê figuris de Trinitât, insiemi cul Fi e cul Spirtussant:  batiâ in non dal Pari, dal Fi e dal Spiritussant (Dino Virgili, La aghe da pît la cleve)
5. s.m. (fig.) cui che al à inviât o che al è figure principâl di une scuele di pinsîr sientifiche o artistiche che i ricognòs la massime autoritât in materie:  il predi […] al à di dî chei nôs e chei sîs che a costin masse a di chei altris […] come che al è stât l'esempli dai paris de Glesie (Francesc Placerean, Il popul furlan al à ancjemò nostalgjie des robis bielis e santis); si pues dî cuntune cierte sigurece che Tellini al è il pari di ogni idee di Friûl cuntune filusumie diferente e di une sô esistence, reâl o in divignî, tant che nazion autonome (Donato Toffoli, Il lunari mai jessût - Tellini te prime vuere mondiâl)
   Sin. mestri , promotôr , soremestri
   
   1. cui che al fat nassi o che al à permetût di nassi a alc:  Cecot al pues considerâsi tra i paris de grafie furlane uficiâl. Ben, se no propite il pari, almancul il copari (Adrian Cescje, Memoriis di politiche linguistiche)
6. s.m. (fig.) element, fatôr che al prodûs une consecuence:  l'ozi al è il pari di ducj i vizis
   Sin. cause , origjin
7. s.m. titul dât ai fraris che a àn vût la ordenazion sacerdotâl:  dilunc dal secul XII, la Glesie e je stade slargjade e furnide, a Est, di trê absidis semicircolârs. Si pues pensâ che chest al sedi sucedût par opare dai paris benedetins (Aministrazion Publiche, Cjavaç Antiquarium de Plêf di Sant Stiefin)
   
   1. ancje denant dal non:  al rivà a Codroip, provisori, un oblât di Ribis, pari Ermacore (Antoni Beline, Pre Pitin)

Polirematichis e espressions idiomatichis

• pari di famee loc.s.m.
• pari eterni loc.s.m.
• pari lastri loc.s.m.
• pari naturâl loc.s.m.

Proverbis:

• ancje cheste e je fate, al diseve chel che al veve maçât so pari
• beâts chei fîs che a àn lôr pari a cjadaldiaul
• cuant che il pari al fâs carnevâl, i fis a fasin cuaresime
• dulà che il pari al met il claut il fi al picje il cjapiel
• i fis a train daûr dal pari
• i fruts a àn gust di dî: pari gno bon e no pari gno biel
• i fruts no disin: pari biel, mari biele; ma: dami alc in te scudiele
• il pari bon al dopre il baston
• l'ozi al è il pari de miserie e dal vizi
• l'ozi al è il pari di ducj i vizis
• la buine dote le da il pari, la buine femine il Signôr
• no stâ saltâ vidiel se no gno pari ti maride
• par une volte si fasije ancje a so pari
• pari e paron a àn simpri reson
• tâl il pari, tâl il fi
• un pari al manten cent fis, ma cent fis no rivin a mantignî un pari
• un pari al manten dîs fîs, dîs fîs no son bogns nancje di mantignî une mari
• un pari al nudrìs dîs fîs e dîs fis no son bogns di mantignî il pari