Dizionari de Lenghe Furlane

fi¹  fi  [FO]

1. s.m. persone considerade in riferiment a sô mari e so pari:  se tu vegnis par di là, ti presenti il gno om, i miei fîs e chei altris parincj (Carlo Sgorlon, Prime di sere); dopo, di pari in fi, la proprietât e jere deventade simpri plui grande (Carlo Sgorlon, Il dolfin); i ai un fi che al à da nassi (Novella Cantarutti, Scûr e lusour)
   Sin. canai , creature , frut¹ , fiol , fion
   Cfr. prole , fiolance , famee
2. s.m. [BF] in gjenerâl, frut o zovin, ancje cence relazion di parintât:  un puar fi patît e mâl metût (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. fiol , frut¹ , canai
3. s.m. tant che apelatîf a une persone plui zovine o che in ogni câs si trate cun confidence:  [Meni Fari] - Isal biel il Paradîs? [Sant Pieri] - Joi!… Ma tu, fi gno, come che ti ai dit, tu pues fâ crosetis (Luigi Gortani, Meni Fari)
   Sin. fion , frut¹ , fantat , frutat , fiol , creature
4. s.m. [TS] teol. spec. cun iniz. maiusc., Crist tant che fi di Diu e une des personis de Trinitât:  batiâ in non dal Pari, dal Fi e dal Spiritussant (Dino Virgili, La aghe da pît la cleve)
5. s.m. persone considerade rispiet ae sô patrie, al so paîs, ae sô comunitât:  o sin contents che ancje il gnûf vescul al vedi mût di lei chestis pagjinis e di cognossi, almancul un freghenin, un predi, fi dal Friûl e de Glesie di Aquilee (Roman Michelot, Riflessions di un predi cjargnel)
   Sin. fiol
6. s.m. persone che e mostre lis cualitâts positivis e negativis dal so ambient, dal so moment storic e v.i.:  pre Zaneto al jere un fi dal popul e come un fi dal popul al meteve jù lis sôs poesiis cuntune ande popolaresche (Roberto Iacovissi, Pre Zaneto); "Manga, parcè dopristu simpri chestis brutis peraulis?" "Orgnan, tu sês propit un orgnan! Jo o soi un fi dal mio timp e, tu sâs che i militârs a fevelin simpri sporc!" (Checo Tam, Sense)
7. s.m. (fig.) ce, cui che al derive, che al è causât di cdn., di alc, di une cierte situazion e v.i.:  chest stes volum al è fi dal Dizionari Ortografic Furlan di Informazion Furlane, miorât e articolât te forme particolâr che e caraterize la stampe a pet dal imprest informatic (Sandri Carrozzo, Jentrade dal DOF); la Glesie di Viene e je fie di chê di Aquilee; chê di Augsburg e je fie di Aquilee; chê di Como e je fie di Aquilee; chê di Lubiane fint a Zagabrie, ancje! Come chê di Mantue e dutis chês dal Venit (Francesc Placerean, La nestre storie)
   Sin. consecuence , efiet , prodot , risultât
8. s.m. menade gnove di une plante, viôt sfi :  da la radrîs pulula ator un bosc frondôs di fîs (Zuan Josef Busiç, La Gjeorgjica di Virgjili)

Polirematichis e espressions idiomatichis

• fi di anime loc.s.m.
• fi lastri loc.s.m.

Proverbis:

• beâts chei fîs che a àn lôr pari a cjadaldiaul
• contadin no stâ seâ parcè che la mari il fi e à di bagnâ
• cuant che il pari al fâs carnevâl, i fîs a fasin cuaresime
• cui che al à un sôl cjamp al fâs un ort, cui che al à un sôl fi al fâs un porc
• cui che al strussie pai fîs tal ultin al à nome che suspîrs
• cui che di gjate al nas surîs al pie e se no 'nt pie, no je sô fie
• cui che i vûl masse ben ai fîs ju tradìs
• cui che nol è bon fi nol è bon marît
• dulà che il pari al met il claut il fi al picje il cjapiel
• fi sôl: o mat o lôf
• fi unic, baron fotût
• fîs piçui, fastidis piçui; fîs grancj, fastidis grancj
• i fîs a train daûr dal pari
• i gjenitôrs a àn il dovê di mantignî i fîs fin che a àn sessante agns finîts; e po passâur il tabac
• la supierbie e je fie da la ignorance
• ognidun al è fi des sôs azions
• se o ves un fi che al ves non doman, o volarès maçâlu daurman
• tâl il pari, tâl il fi
• un pari al manten cent fîs, ma cent fîs no rivin a mantignî un pari
• un pari al manten dîs fîs, dîs fîs no son bogns nancje di mantignî une mari
• un pari al nudrìs dîs fîs e dîs fîs no son bogns di mantignî il pari