Dizionari de Lenghe Furlane

mateâ  ma|te|â  [AF]

1. v.intr. jessi mat o deventâ mat o compuartâsi come un mat:  done Pine, dopo cualchi setemane che si cjatavin in chê cjase, e començà a mateâ, a «dâ i numars», e diseve la int (Pieri Menis, Chei di Muraie)
   Sin. çavariâ , deventâ mat , batile
2. v.intr. passâ il timp in zûcs o divertiments o disint robis pôc seriis o ridiculis:  la Lile e coreve ator mateant, amie di ducj i fruts (Maria Forte, Cjase di Dalban); al sintive il crustâ de nêf sot dai pas de int che e leve in glesie, il mateâ e il ridi dai fruts che al clarôr de nêf si balonavin (Pieri Somede dai Marcs, Nadâl); si viôt che [i fruts] a dutrine, invezit di stâ atents, a matein cui Gormiti (Maurizio Mattiuzza, Al mancje un re)
   Sin. zuiâ , scherçâ , bagolâ , spassâsi , sorâse , pierdisi vie , svagâsi , zugulâsi , palotâ
   
   1. dî une robe par scherç, cence jessi seri, no dî pardabon:  cui à dit che a son barbars i Teutonics? Lu vevi dit jo ma… o mateavi (Checo Tam, La maree nere)
3. v.intr. svicinâsi, tocjâsi, stuzigâsi par ridi, ma cun intindiment sessuâl:  al tornà a sentâsi daprûf di Viole che e stave mateant cun Valter, fasintsi bussatâ e picigotâ (Amedeo Giacomini, Tal ospedâl); a un soldadut che al voleve mateâ cun me fûr dal cine, i ai dadi une pocade cul comodon che lu ai butât di chi culà! (Pieri Piçul, Vieri e gnûf)
   Sin. zuiâ , trapolâ , cjossolâ , tichignâ
   Cfr. cumbinâ
4. v.intr. movi alc dibant, soredut par passâ il timp o ancje par parâ vie il gnervôs:  al trotave beât […] mateant cuntun fros di jerbe in bocje (Alan Brusini, I ribei); il pinsîr si piert, intant che al matee cu la ponte de roncee jenfri de jerbe (Franco Marchetta, Madalene)
   Sin. zuiâ , bagolâ , pierdisi vie , svagâsi , zugulâ
5. v.intr. (fig.) impegnâsi, fâ fadie mentâl o fisiche, par rivâ a un risultât, cjatâ une soluzion e v.i.:  [lis scuelis] a volevin fâlis di trê plans, par no mateâ une altre dì a alçâlis (Riedo Pup, Il façolet dal Dacian); no tu âs voie di stâ a mateâ e a fâ di gustâ, tu cjolis il mangjâ pront (Bete di Spere, Take away)
   Sin. bacilâ , deventâ mat , discervielâsi , lambicâsi , batile , çavariâ , strolegâ
6. v.intr. cjapâ alc sul seri e pensâ parsore, par une preocupazion, par une ofese e v.i.:  Berto cualchi volte al restave mâl, ma pal plui nol mateave (Franca Mainardis, Aiar di cjase); Udin, ae fin, si gjolt chê zornade di marcjât cence tant mateâ tal domandâsi cui che al è paron e cui sotan (Raffaele Serafini, Soreli jevât a mont)
   Sin. bacilâ
   
   1. fâ alc par pinsîr, par rivuart:  "Ma no, no, che no stein mateâ par me, nol ocor nuie" (Pieri Somede dai Marcs, Barbane)
      Sin. preocupâsi , pinsirâ , bacilâ , dâsi pinsîr , disturbâsi
   2. vê une reazion negative:  il cjastron al puce. Ma no si mateave in chê volte se il cjastron al puçave (Ivano Urli, La gnove stazion)
      Sin. zirâsi , voltâsi
7. v.intr. fâ une cualchi azion no ben definide:  il paron al veve il vizi di fevelâ di bessôl, cuant che al mateave ator dai telârs par so cont (Raffaele Serafini, Contis sot spirt); Zuan al mateava cul tirabori sul fogalâr (Novella Cantarutti, La Santa); ce stâstu simpri a mateâ cun chel telefonut? (Bete di Spere, Chat)
   Sin. trapolâ , cjossolâ , argagnâ , remenâ

Proverbis:

• cui che al à voie di mateâ che al compri un orloi o che si ledi a maridâ
• un mat al fâs mateâ cent savis