Dizionari de Lenghe Furlane

pierdisi vie    [AF]

1. loc.v. deventâ a man a man mancul fuart, sparî a man a man:  si sintive i pas des çuculis a rimbombâ come colps batûts su cassis vueidis che si pierdevin vie subit pai rivâi e tes cisis neris (Pieri Menis, Il pignarûl)
   Sin. bonâsi , calâ , pierdisi , lâ al mancul , lâ in nuie , sfantâsi , sparî
2. loc.v. lâ vie, fin a no jessi plui viodût:  nol spietà trop. Cualchi pas in vuaite e subit dopo une figure che e jes fûr in presse si piert vie pe gnot (Pieri Menis, Nadâl ancje par Gjelmin)
   Sin. lâ vie , slontanâsi , sparî
3. loc.v. pierdi concentrazion, lant cul pinsîr daûr di fantasiis o ancje cence pensâ a nuie, ancje fin a indurmidîsi o a lâ in svaniment:  insentade sui scjalins denant de puarte, e si pierdeve vie a cjalâ fis denant di se, cu la gusiele ferme te man (Maria Forte, Dome la cjampanute di Sant Bortul); mi fermai e mi pierdei vie. «Ce fâstu culì, macaco?» Mi jeri indurmidît tal cuchil (Pieri Menis, Il burlaç)
   Cfr. straviâsi , imbarlumîsi , incocalîsi , discjolisi , indurmidîsi , impisulîsi , vê imbast
4. loc.v. passâ il timp dibant o in divertiments:  e rideve tal soreli e si piardeve vie daûr des rosis tal zardin (Dino Virgili, La aghe da pît la cleve); il Nino al zuiave cun La Rovente, la scuadre di balon dal Sante Marie e alore, la domenie, dopo zuiât si pierdeve vie cui amîs de scuadre tornant dongje a straoris (Ivano Urli, Veruska)

Components:

• pierdisi v.pron.intr., v.pron.tr.
• vie s.f., av., inter., s.m.sing., prep.