incrosâ
in|cro|sâ
[AF]
-
v.tr.
meti a forme di crôs o che si pues someâ cuntune crôs, cun elements che si passin un parsore di chel altri in maniere trasversâl:
al pleà in doi il cussin, al incrosà i braçs daûr il cjâf e si metè a cjalâ difûr (Carlo Sgorlon, Prime di sere)
-
v.tr.
di une linie o di une element lunc, passâ alc in maniere trasversâl o plui o mancul trasversâl:
un pôc plui indevant, la strade e incrosave chê che e vignive sù di Vât (Gianni Gregoricchio, Trê feminis);
al veve let che il tunel stradâl al jere dibot paralêl a chel feroviari e che a un ciert pont lu incrosave passantji parsot (Agnul di Spere, Fieste di inaugurazion)
Sin. taiâ
, traviersâ
, scjavaçâ
-
v.tr.
cjatâsi cun cdn. o cun alc che al ven de bande contrarie:
cuant che al tornave indaûr, al incrosà Rita e Ricardo che a jessivin di cjase in chel moment (Carlo Sgorlon, Prime di sere);
al vîf la sô vite, sclet e mugnestri, cence fâi mâl a dinissun. Se mai al po, al procure anzit di fâi un fregul di ben ae int che al incrose pe strade (Ivano Urli, Storie di Min)
Sin. cjatâ
, cjatâsi
, imbatisi
, intivâ
, intivâsi
, intopâsi
, scuintrâsi
, scuintrâ
, incuintrâsi
, incuintrâ
, incrosâsi
-
ancje di cjalade o sim., jessi indreçade a cdn. tal moment che ancje chel al cjale:
e jere come simpri, buinegraziose con ducj. Dome cuant che i siei voi a incrosavin chei di lui e deventave seriose (Gianni Gregoricchio, Îr e doman)
Cfr. scambiâsi
-
v.tr.
[TS]
biol., zoot., bot.
fâ che si fecondin dôs speciis o razis diferentis di animâl o di vegjetâl:
si à provât a incrosâ varietâts europeanis preseadis cun speciis e varietâts nordamericanis che a jerin za gjenetichementri resistentis ai foncs e a la filossare de vît (Enrico Peterlunger, Lis varietâts di vît resistentis a lis malatiis)
Sin. ibridâ
, cubiâ
Cfr. messedâ
, misturâ
, miscliçâ
-
v.tr.
meti dongje elements diviers in mût di otignî un ciert efiet:
[il film "Mugulis"] cul incrosâ in maniere origjinâl gjenars tant che video-art e documentari di memorie, al fâs saltâ fûr il rapuart fuart jenfri il popul dal flum e la sô tiere: la aghe (Fabian Ros, I premiâts da la Mostre dal Cine Furlan)
Sin. messedâ
, misturâ
, miscliçâ
, cubiâ
, dâ dongje
, meti dongje
-
v.tr.
meti in confront elements o listis di elements in mût di cjatâ analogjiis e diferencis:
incrosant cheste liste cui dâts dal corpus, si viôt che lemis furlans corispondents a talians FO e ÛA a cuvierzin tor dal 91% dal ûs (Sandri Carrozzo, Franz Feregot, La elaborazion di un corpus etichetât de lenghe furlane scrite: esperiments e prospetivis)
-
v.tr.
[TS]
sport
tal balon, fâ un passaç che al taie il cjamp in maniere trasversâl:
tu devis fâ trê pas e po passâle a Carli che al incrose a diestre! E no butâle dulà che tu âs voie tu (Stiefin Morat, Donald dal Tiliment)
-
v.tr., v.intr.
[TS]
aer., mar.
passâ ancje plui di une volte te stesse zone