Dizionari de Lenghe Furlane

distacâ  dis|ta|câ  [AF]

1. v.tr. dividi o gjavâ ce che al è tacât:  al tacà a molâi di chês gnervadis di distacâ la piel (Roberto Ongaro, Il muc); la Taresie e distacà dal mûr il cuadri de Madone, i bussui da la aghe sante e il ritrat dal om (Maria Forte, La tiere di Lansing); il ducât de Carintie, cul Cragn, il Staiar, la Istrie e il Friûl, al ven distacât de Baviere (Josef Marchet, Cuintristorie dal Friûl fin sot la Italie)
   Sin. disbletâ , dispicjâ , disseparâ , diszontâ , dividi , stacâ
   
   1. cjapâ in maniere isolade alc che al sarès leât o conetût cun altris elements:  la storie dal sclavisim nordmerecan no pues jessi distacade di une suaze religjose calviniste e fondamentaliste (Luche Nazzi, I sclâfs dal tierç milenari a passin ancje par ca)
   2. gjavâ un animâl dal jôf o dai furniments che lu tegnin leât al cjar, ae caroce e v.i.:  strighiâ, tacâ e distacâ i cjavai dal paroncin (Riedo Pup, I furlans e i bêçs)
2. v.tr. (fig.) dislontanâ di cdn, di un interès, di une ativitât e v.i.:  no si rive adore di distacâlu de television
   Sin. disafezionâ , disamorâ , discjoli , disclaudâ , dislontanâ , disviâ , dividi
   
   1. indreçâ di une altre bande i voi, la atenzion, il pinsîr e v.i.:  l'om in gjachete al cjalave chei mots cence rivâ a distacâ i voi, niçulant planc il cjâf in cunvigne cul cjant (Serena Fogolini, Cul ridi); distacait il pensier da chista val di dolôrs, pensait a la vita eterna (Federigo Comelli, Il me paîs)
      Sin. disafezionâ , disamorâ , discjoli , dislontanâ , disviâ
   2. slontanâ di une implicazion emotive:  li chel cjalâsi le distacave za un pôc di ce che al jere passât (Maria Forte, Cjase di Dalban)
3. v.tr. [TS] milit. mandâ in distacament
   Sin. dedicâ , destinâ , meti , plaçâ , trasferî
   
   1. burocr. mandâ cdn. a un servizi particolâr
      Sin. dedicâ , destinâ , meti , plaçâ , trasferî
4. v.tr. lassâ indaûr cdn., spec. intune competizion, intune classifiche e sim.
   Sin. lassâ indaûr
5. v.tr. spec. di un aparât o di un servizi, di energjie e v.i. gjavâ di un circuit, di une rêt o no permeti di passâ:  il gjestôr al clame e al vise: "O distachìn la distribuzion ca di une ore" (Oscar Puntel, I coscj de energjie)
   Sin. gjavâ , sospindi , taiâ
   
   1. fâ che un aparât o un sisteme nol funzioni plui:  il puest che a cirivin nol jere segnât sul navigadôr e Ismaêl al veve scugnût distacâ il pilote automatic (Raffaele Serafini, Altris contis di famee)
      Sin. distudâ
6. v.intr. lassâ di lavorâ, par une polse, par vie che al è finît l'orari o ancje molant dal dut il puest di vore:  tai ultins timps, cualchidun di chei che a lavoravin cun lui si fermave, a voltis, ancje doi, trê dîs cence distacâ (Gianfranco Pellegrini, Cidulis)
   Sin. molâ , vignî fûr , dismontâ
   
   1. cjapâ une polse:  tun mont frenetic, e je une dibisugne interiôr di cjatâ moments e timps di distacâ, di fâ alc altri (Antoni Beline, Te colme des vacancis)

Polirematichis e espressions idiomatichis

• tache e distache loc.av.

Proverbis:

• sborf, là che si tache no si distache