Dizionari de Lenghe Furlane

dividi  /-vì-/  di|vi|di  [FO]

1. v.tr. discomponi in tocs, in parts:  "I miei dîs, mi soi nacuart, / son contâts, son par finî; / ma il ream, prime de muart, / vuei dividilu cussì…" (Emilio Nardini, Chê di Peonis); la cuistion dai «Trê cjapitui» e finì cul dividi il patriarcjât: in Aquilee (o a Cividât) un patriarcje schismatic favorît dai Langobarts; a Grau un patriarcje unît sot la protezion dai bizantins (Josef Marchet, Cuintristorie dal Friûl fin sot la Italie)
   Sin. discomponi , disparselâ , frazionâ , sezionâ
2. v.tr. fâ che alc che al à une sô unitât si distingui in plui parts:  al dividè il ministeri in cuatri dipartiments: fantarie e cavalarie, artiliarie e gjenîrs, intendence, aministrazion (Giovanni Pillinini, Zuan Batiste Cavedalis - Une vite esemplâr); il stanzon scûr e maglât di mufe, al jere dividût in doi parmieç di un bancon di noiâr (Gianni Gregoricchio, Îr e doman)
   Sin. scompartî , articolâ , frazionâ
3. v.tr. fâ di confin, di element di distinzion e v.i.:  al è un sempliç porton di len che al divît la cjase dal plevan di dut il rest (Franco Marchetta, Madalene); la aghe dal Luri e faseve un grant arc che al cjapave dentri dut il ronc dai Batistons e lu divideve dal paîs (Dino Virgili, La aghe da pît la cleve)
   Sin. separâ , isolâ , scompartî , spartâ , disisolâ
   
   1. jessi tal mieç di doi o plui elements, tal spazi, tal timp, in percezions astratis e v.i.:  dada una ultima cjalada a la barcja dei contadins come par misurâ la distança che ju divideva da plui, […] cul rem ne la man: «Anìn!» disè al fi, e si butà cun duta la persona a una voga infuriada (Federigo Comelli, Il me paîs); i viei a àn denant di lôr, come uniche prospetive, la muart, ma forsit no je chê la piês robe; piês al è chel toc di strade, scure indefinide vueide e spaventose, che a ju divît da la muart (Franca Mainardis, Aiar di cjase)
4. v.tr. meti i elements di un grup in plui grups plui piçui:  ogni scuadre e à 16 tocs che a vegnin dividûts in cheste maniere: 1 Re, 1 Regjine, 2 Rocs, 2 Alfîi, 2 Cjavai e 8 Pedons (Nilde Teresa Negro, Zuìn di scacs)
   Sin. dicerni , diferenziâ , disparselâ , dispartî , distingui , diszontâ , spartî
5. v.tr. fâ une selezion slontanant cierts elements:  dividi lis pomis maduris di chês indaûr
   Sin. disseparâ , separâ , tirâ vie , meti in bande , gjavâ , curâ , dicerni
6. v.tr. vê la percezion dai limits di robis diferentis tra di lôr:  ducj chescj pinsîrs le vevin ridote a vivi intun stât di confusion fra i doi monts, chel dai vîfs e chel dai muarts, chel de sperance e chel dal sconfuart, chel de realtât e chel dai siums. No rivave plui a dividiju fra di lôr (Roberto Ongaro, Il muc); cussì no si capìs plui nie. No si rive a dividi la semule dal forment (Gianfranco Pellegrini, Evelin)
   Sin. separâ , disseparâ , distingui , dicerni , diferenziâ
7. v.tr. fâ in maniere che elements o personis che a jerin insiemi, dongje, cuintri e v.i. no sedin plui dongje:  ogni volta che lis dôs barcjis pareva che dovessin tocjâsi, una gnova ondada lis divideva indaûr (Federigo Comelli, Il me paîs); un don di Diu che al scugnive pûr rivâ une zornade, par dividi chei fradis che si maçavin, par salvâ la zoventût (Maria Forte, La Madone de Pâs)
   Sin. separâ , slontanâ , parâ in bande
8. v.tr. fâ in parts di assegnâ o di cjapâ un pôc parom:  cuant che il defont sindic Reglan al veva dividût i boscs dal cumun in lots, un par famea, il bosc di Viea a i era tocjât ai Specars (Novella Cantarutti, I cjans di not); i fîs di Meni de Coste, dopo tant timp, si jerin dâts dongje par dividi ce che al jere restât: tocs di tiere ca e là (Pieri Menis, Destins)
   Sin. dâ fûr , dispartî , dispensâ , distribuî , spartî
   
   1. frontâ un impegn, une spese e v.i. insiemi cun altris:  no podìn lassâsi cjapâ ducj tun fas e dividi lis responsabilitâts tremendis di cheste gjernazie cence cjâf (Josef Marchet, Par intindisi)
      Sin. dispartî , distribuî , spartî
   2. vê, gjoldi, doprâ, cjapâ e v.i. insiemi cun altris:  Momi vûstu fermâti a gustâ cun nô, […] dividarìn il companadi, a la buine sâstu (Pieri Somede dai Marcs, Un pugn di moscjis); Luigjina, che e veve vinçût une biciclete inte pescje di beneficence, e veve scugnût dividile cun sô sûr, cu lis cusinis, cui nevôts e cui fîs (Cristina Noacco, Faliscjis)
      Sin. condividi
9. v.tr. (fig.) vê, meti in comun un sintiment, une emozion e v.i.:  Meni al divideve cun ducj lôr cheste gjonde (Gianni Gregoricchio, Trê feminis); il pês de mê situazion al jere masse fuart in chel moment, e jo o vevi bisugne di dividilu cun ognidun (Carlo Sgorlon, Il dolfin)
   Sin. spartî , condividi , vê part , dâ part , meti a part
10. v.tr. (fig.) produsi disconcuardie:  une femine nus veve dividûts, ancje se di jê cumò no mi impuartave plui nuie (Carlo Sgorlon, Il dolfin)
    Sin. slontanâ , separâ , distacâ , meti cuintri
11. v.tr. [FO, TS] mat. calcolâ lis voltis che un numar al conten un altri:  il diametri si calcole dividint la circonference par 3,14
    
    1. ancje ass., fâ une operazion di division:  o sai sotrâ, dividi, / moltiplicâ par ridi: / la regule del trê / je une scuviarte mê (Pieri Çorut, La mê biografie)
12. v.tr. [CO, TS] mat. jessi contignût un numar just di voltis intun altri numar intîr:  il trê nol divît il vot

Proverbis:

• par grande che e sedi la fertaie cuant che si è in putrops a dividile, la fete e tocje piçule