Dizionari de Lenghe Furlane

disseparâ  dis|se|pa|râ  [AF]

1. v.tr. distacâ personis, robis, elements che a son unîts o insiemi o messedâts, o dividi in plui parts un element ugnul:  "Tu no tu sarâs bessole! O sarai jo cun te!" "E se nol sarà cussì? Se Diu nus disseparerà: un a gjestre e chê altre a çampe?" (Sandri Mucci, Il Trê di Avrîl di Ane); o met a puest un grum di fotografiis di Cividât, che a son di agns platadis intun scansel. O scomenci a disseparâlis par argoments (Claudio Mattaloni, La acuile di Cividât)
   Sin. separâ , dividi
2. v.tr. (ancje fig.) stâ tal mieç di elements diviers, impedint che si unissin, che si messedin, che si confondin, che a sedin in comunicazion e v.i.:  no vêso pôre che cu la indipendence si tirin sù dai mûrs che us disseparin di chei altris? (Carli Pup, La Scozie su la strade pe autodeterminazion); a plan tiere un stramieç di sgrisiole, al disseparave la cjamare dulà che durmive la mari (Renzo Balzan, Tomâs al cîr la veretât)
   Sin. separâ , dividi
   
   1. ancje di element temporâl, jessi tal mieç jenfri doi tiermins o jenfri un sogjet e un event:  vincjecuatri oris lu disseparavin di chel judizi (Roberto Ongaro, Cretevierte)
3. v.tr. dividi concets, ideis e v.i.:  il domini de teologjie e chel de fisiche no son stâts dome disseparâts in linie di principi, a son stâts disseparâts ancje inte pratiche cuotidiane e soredut intal lengaç (Sergio Cecotti, Teologjie algjebriche); nol vûl nuie altri che pandi sigurecis elementârs, disseparant ce che al è bon di ce che al è trist, (Carlo Sgorlon, Presentazion di Il sît di Diu)
   Sin. distingui , dividi , separâ , dicerni , discriminâ
4. v.tr. (fig.) produsi une distance, spec. psicologjiche o afetive, ancje une disconcuardie e v.i.:  Nita e alçà il cjâf dal lavôr e chel grop tal cuel no le lassave movi flât: chel tasê lis disseparave (Dino Virgili, La aghe da pît la cleve)
   Sin. separâ , dividi , slontanâ , dislontanâ
   
   1. produsi une diference, une discriminazion:  i zovins a àn vût une educazion linguistiche dal talian che e disseparave, par prestigji, la lenghe regjonâl di chê statâl (Alessandro Tavano, Zuiâ cu la lenghe)
      Sin. discriminâ , separâ , dividi , slontanâ , dislontanâ