Dizionari de Lenghe Furlane

cjarie  /-à-/  cja|ri|e  [AF]

1. s.f. cuantitât di robe, cuntun ciert volum e pês, di puartâ o traspuartâ o mandâ o sim.:  si ere inviade pe strade de Braide gnove, e incuintrà propit Anzul che al lave a menâ une cjarie di ledan tal Cuadrel (Pieri Menis, A uciei cu lis archetis); co son a mieze mont, li da maine, a poin jù la cjarie par poussâ une dade (Luigi Gortani, Il matescul di Cjabie)
   Sin. caric , cjame
2. s.f. azion di preparâ, meti dongje o meti sù robe par puartâle, traspuartâle, mandâle o sim.:  tal dopomisdì là dal pravilegjo e fasevin la cjarie, po e menavin il cjar sot il puarti di cjase e la matine, ancjimò di scûr, e partivin un daûr chel altri, cidins cidins (Pieri Menis, Gno nono)
   Sin. caric , cjame
3. s.f. fuarce esercitade di un cuarp par efiet de gravitât o par une pression
   Sin. caric , pression , pês¹ , cjame
4. s.f. (fig.) ce che al compuarte un pês, une fadie, un impegn, ancje imateriâl, psicologjic, morâl e v.i.:  ducj o cjaminìn sot la cjarie dai nestris difiets (Pieri Piçul, Vieri e gnûf)
   Sin. pês¹ , cjame
   
   1. ce che al compuarte une spese, un impegn economic, il paiament di un tribût o sim.:  une cjarie di tassis masse pesante
      Sin. impegn , cost , cjame
      Cfr. imposizion , agravece
5. s.f. (fig.) ce che al compuarte une tension, un potenziâl:  tal temperament dai talians e je une cjarie tremende di passion, di calôr, di facilitât a entusiasmâsi e a butâsi jù (Josef Marchet, Sflacjons e insolents); la cjarie gnervose che lu sostignive e che lu veve fat resisti ai dolôrs e a la fadie fin in chel moment, si sfantà (Roberto Ongaro, Il muc)
6. s.f. posizion di responsabilitât intune cierte ativitât, soredut publiche o intune struture complesse:  Indrì IV lu veve volût dongje di se tant che Cancelîr, une cjarie cetant impuartante, une specie di Segretari di Stât (Angelo Floramo, La nassite dal nestri Stât); o lassai la cjarie di president dal Moviment Friûl e o podei meti plui timp e impegn te azion di politiche linguistiche e identitarie (Adrian Cescje, Memoriis di politiche linguistiche)
   Sin. incjarie , incarghe , funzion
7. s.f. (fig.) grande cuantitât, ancje di alc di imateriâl:  "[…] parcè varessio di votâ par te?!" "Cemût saressie a dî parcè?! Ti regali une cjarie di crostui e une camionade di fritulis, se tu mi votis!" (Raffaele Serafini, La ostarie di Pieri)
   Sin. baste , cjame , frac , mont² , sglavin , sglavinade , slac , vore , sdrume , grum
8. s.f. (fig., pop.) stât di inflamazion e in câs ostruzion des viis respiratoriis:  se o vês il nâs stropât di une cjarie di rafredôr, nuie di miôr che un spray a base di Euphorbium (Fabian Ros, Une plante par medisine)
   Sin. costipazion , sope , cjame
9. s.f. il meti in cundizion di funzionâ un aparât cul dâi o cul metii la energjie, la tension, il carburant, lis munizions o sim. che i coventin:  tignî in cjarie une batarie
   Sin. cjame
   
   1. la energjie, la tension, il carburant, lis munizions o sim. che i coventin a un aparât par funzionâ:  la cjaria di polvar par un fusîl di infantaria (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera)
10. s.f. [TS] eletr., fis., chim. viôt cjarie eletriche :  un materiâl fotosensibil nol è in grât di produsi in maniere spontanie une corint eletriche pal fat che lis cjariis dentri dal materiâl si spostin in mût dal dut disordenât (Lorenzo Marcolini, Lis celis organichis nanostruturadis)
11. s.f. azion di fuarce cuintri di cdn., assaltantlu o sburtantlu:  la polizie e je intervignude in plui di une ocasion cuintri dai students cun cjariis e cu la identificazion dai partecipants (Carli Pup, Simpri plui aiar di indipendence)
    Sin. cariche