Dizionari de Lenghe Furlane

scjariâ  scja|ri|â  [AF]

1. v.tr. gjavâ une cjarie, une cjame:  al cjol bessôl su la schene doi trê sacs a la volte e ju scjarie suntun scjalâr (Dolfo Zorzut, Viôt di no fâ dal mâl al furistîr)
   Sin. discjariâ , scjamâ , discjamâ
   
   1. diliberâ o disvuedâ di une cjarie, di une cjame:  Jacum ogni tant al rivave a fâ jentrâ alc di cuintribant, ma bisugnave stâ une vore atents par dôs resons: la prime, par no paiâ une multe salade; e la seconde par no fâsi segnâ tal libri neri… se no ti fasevin scjariâ il cjar ogni volte che tu passavis (Angelo Covazzi, Un salam)
   2. (ancje ass.) meti jù alc che si puarte:  il mulinâr juste in pont al vignive fûr de puarte par judâlu a scjariâ e par dîi ancje che fin tal doman nol podeve masanâi (Luigi Gortani, Il matescul di Cjabie)
2. v.tr. lassâ jù i passizîrs daspò di vêju puartâts li che a vevin di lâ
   Sin. dismontâ , lassâ , molâ , discjariâ
3. v.tr. lassâ tun ciert puest materiâl che nol covente plui:  chei de Comune e àn volût scjariâ i rifundums dai paîs di venti sù [tal Cuar] (Lucio Perès, Tal Cuar)
4. v.tr. lassâ lâ o lassâ colâ un ciert materiâl:  a cirivin di scjampâ, intant che aeroplans a ondadis ur scjariavin parsore bombis, e ju metraiavin (Pieri Menis, Sul agâr)
   Sin. discjariâ , molâ
5. v.tr. (fig.) gjavâ un pês morâl, un pinsîr, une responsabilitât, un pês economic e v.i.:  ogni tant bisugne pûr scjariâ la cussienzie (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. diliberâ , liberâ , slizerî , discjariâ
   
   1. dâ a cdn. altri un pês morâl, un pinsîr, une responsabilitât, un pês economic e v.i.:  lâ indenant pensant ognidun al propri interès e scjariant a chei altris lis colpis e i problemis di risolvi (Luca Zoratti, Il Friûl il Sudtirôl e Ponzi Pilât)
      Sin. butâ , molâ , sgnacâ , sbolognâ , discjariâ
6. v.tr. disvuedâ une arme gjavant i proietii
   Sin. discjariâ
   
   1. trai i colps di une arme:  jo, che mi dein pûr un mês di preson, scjarii la sclope che l'è un gust [lant a cjace] (Dolfo Zorzut, Chel cjamp ta gravis)
      Sin. trai , sbarâ , discjariâ
7. v.tr. (fig.) lassâ lâ fûr une emozion, un sintiment, une tension e v.i. o fâ che si sbassin:  cjatâ un moment di evasion dal drandran di ogni dì par scjariâ il gnervôs (Antoni Beline, Fra lis letaris e la politiche)
   Sin. discjariâ
8. v.tr. gjavâ des tassis
   Sin. butâ jù , tirâ jù , discjamâ , discjariâ
9. v.tr. gjavâ, fâ pierdi la cjarie eletriche:  i vevi scjariât la batarie a la machine di papà a fuarce di scoltâ lis cassetis (Checo Tam, Joe Tex e Joe Cocker)
   Sin. discjariâ , scjamâ , discjamâ
10. v.tr. [CO, TS] inform. salvâ tun aparât un contignût disponibil in rêt:  scjariâ programs di Internet cence scugnî paiâ licencis (Redazion Lenghe.net, Lenghe furlane=Inovazion)
    Sin. discjariâ , scjamâ , discjamâ , tirâ jù