Dizionari de Lenghe Furlane

discjariâ  dis|cja|ri|â  [AF]

1. v.tr. gjavâ une cjarie, une cjame:  un cjar di robe al vignive devant dal puarton, dentri tal zardin, e al fermave da pît la scjalinade, e cuatri cinc di lôr in toni a discjariavin la mobilie (Dino Virgili, La aghe da pît la cleve); a lavin a vore a discjariâ cassons di pomis e verduris li dai Marcjâts Gjenerâi (Marc Stolf, Al è simpri cualchidun che al è "plui mancul" di te)
   Sin. scjariâ , scjamâ , discjamâ
   
   1. diliberâ o disvuedâ di une cjarie, di une cjame:  il cjar lu ai discjariât (Zaneto, Il jet)
   2. (ancje ass.) meti jù alc che si puarte:  a menavin jù i minerâi di fier, dal Cjanâl dal Fier, da la Austrie. A paiavin la dogane a Vençon e a discjariavin te place dal fier a Glemone (Francesc Placerean, La nestre storie)
2. v.tr. lassâ jù i passizîrs daspò di vêju puartâts li che a vevin di lâ:  la viere coriere che e faseve servizi de citadute vicine fin al paîs di Burchenbach, e rivà e e discjarià la sô cjame di int che ogni dì e tornave dal lavôr (Roberto Ongaro, Il muc)
   Sin. dismontâ , lassâ , molâ , scjariâ
3. v.tr. lassâ lâ fûr o fâ lâ fûr une cierte sostance, une cierte materie:  te zone metropolitane [i veicui] a discjariin ta l'atmosfere un 15 milions di metros cubics di gas incuinâts (Lelo Cjanton, Conclusion des cuistionutis)
   Sin. scjariâ , molâ
4. v.tr. (fig.) gjavâ un pês morâl, un pinsîr, une responsabilitât, un pês economic e v.i.:  discjariâ la cussience
   Sin. diliberâ , liberâ , slizerî , scjariâ
   
   1. dâ a cdn. altri un pês morâl, un pinsîr, une responsabilitât, un pês economic e v.i.:  discjariâ la colpe su chei altris
      Sin. butâ , molâ , sgnacâ , sbolognâ , scjariâ
5. v.tr. disvuedâ une arme gjavant i proietii:  si discjariin e cjariin lis armis ae presince dai presonîrs, parcè che si usin par cuant che ju fusilaran (Carli Pup, La seconde Irlande)
   Sin. scjariâ
   
   1. trai i colps di une arme
      Sin. trai , sbarâ , scjariâ
6. v.tr. (fig.) lassâ lâ fûr une emozion, un sintiment, une tension e v.i.:  lis partidis e lis barufis de domenie a discjariin dutis lis rabiis che il guvier al fâs vignî sù a la int vie pe setemane (Riedo Pup, Balon: crodi, ubidî e paiâ); par discjariâ la lôr energjie profetiche a scrivin come che a fevelin tes predicjis in glesie (Adrian Cescje, Memoriis di politiche linguistiche)
   Sin. scjariâ
7. v.tr. gjavâ des tassis:  discjariâ lis spesis medichis
   Sin. butâ jù , tirâ jù , discjamâ , scjariâ
8. v.tr. gjavâ, fâ pierdi la cjarie eletriche:  sierâ aplicazions che a discjariin il telefon
   Sin. scjariâ , scjamâ , discjamâ
9. v.tr. [CO, TS] inform. salvâ tun aparât un contignût disponibil in rêt:  la schede di partecipazion si pues discjariâ dal sît Internet www.sunscontest.com (Natascia Gargano, E torne la musiche internazionâl di Suns)
   Sin. scjariâ , scjamâ , discjamâ , tirâ jù