Dizionari de Lenghe Furlane

liberâ  li|be|râ  [FO]

1. v.tr. fâ che cdn al sedi libar, nol sedi in cundizion di presonie, sclavitût o sim.:  siet mil operaris si movin dai cantîrs di Monfalcon e, menaçant di brusâ preture e presons, a fasin liberâ Minut (Carli Pup, La seconde Irlande); si cjatin oms armâts di sclopis che a vuelin fâ il montafin, ven a stâi la vuere par liberâ il popul (Tarcisio Venuti, La cjase di Toni)
   Sin. diliberâ , sfrancjâ
   
   1. fâ vignî fûr di un puest là che si è blocâts:  ducj deve une man par procurâ di liberâju des ruvinis. Une jone cjadude a traviers dal jet a veve copât sâr Cec. Done Ane le gjavarin fûr vive par meracul (Catarine Percude, La mulinarie)
2. v.tr. fâ cdn. al sedi solevât di alc di negatîf:  oris che si ingrumavin a meti adun une altre zornade che no lu liberave dal so torment soterani (Maria Forte, La tiere di Lansing); la muart di Crist e la sô resurezion a vuelin dî che Crist al è chel che nus libere ancje de muart ancje se nô no capìn cemût (Francesc Placerean, La Pasche)
   Sin. diliberâ , sfrancjâ
3. v.tr. lassâ une stanzie, une cjase e v.i. par che cdn. altri al puedi vêlis a disposizion:  lis sôs robis, i siei libris ju vevin dâts vie par pôc e par nuie, ancje par liberâ lis stanziis [e podê fitâlis] (Carlo Sgorlon, Ombris tal infinît)
   Sin. diliberâ , lassâ , molâ , disvuedâ
4. v.tr. fâ in maniere che un lûc nol sedi plui intrigât o plen di alc:  a lavorarin par liberâ dal pantan il plan a nivel de strade (Carlo Sgorlon, Ombris tal infinît); il materiâl fresc si suiave subite e si podeve liberâ ogni dì i plaçâi (Matteo Ermacora, La emigrazion furlane in Austrie e in Gjermanie)
   Sin. diliberâ , netâ
5. v.tr. gjavâ vie un oblic, un impegn, un dovê e v.i.:  liberât de Presidence dal partît tal Istât dal 1975 e par cualchi an de stesse presince inte sô Direzion gjenerâl, mi movevi in plui formis (Adrian Cescje, Memoriis di politiche linguistiche)
   Sin. assolvi , disimpegnâ , dispensâ , esimi , diliberâ , sfrancjâ
6. v.tr. (fig.) fâ in maniere che une capacitât, une facoltât, un alc di imateriâl no vedin di stâ sot di condizionaments, imposizions e v.i.:  massime intai teritoris imperiâi e in chei elvetics, la Riforme e fasarà di jeve par liberâ lis fuarcis produtivis ma ancje pes rivendicazions di nature sociâl (Fabian Ros, La invenzion dal stât)
   Sin. diliberâ , sfrancjâ , molâ
7. v.tr. lassâ vignî fûr:  intal IV stadi dal sium al ven liberât l'ormon de cressite (Franc Fari, Il cjâf dai furlans)
   Sin. diliberâ , molâ
   
   1. [TS] chim., fis. produsi une liberazion di energjie o di cualchi particule, o produsi une sostance fûr di une reazion:  i cianobateris […] a son dotâts di un aparât fotosintetic bon di liberâ ossigjen (Angelo Vianello, La evoluzion su la tiere. Une storie di competizion e cooperazion)
8. v.tr. [TS] sport intal balon, rivâ a parâ fûr il balon de aree de difese
   Sin. diliberâ
   
   1. meti un zuiadôr in cundizion di zuiâ la bale cence pression dai aversaris:  l’Udin si svicine ae paritât cuntune iniziative di De Paul che al libere Maxi Lopez te aree di rigôr (Marc Stolf, Roma - Udinese 3-1)

Proverbis:

• de triste volontât liberaitnus domine