Dizionari de Lenghe Furlane

nâs  nâs  [FO]

1. s.m. part de muse che e da infûr, jenfri dai voi e parsore de bocje:  cjavei neris e lusints molâts a slas pes spalis, doi voi un fregul a mandule, un nasut picinin e dret (Roberto Ongaro, Il muc); Tite al è tornât a cjase san e sec inmò plui de ultime volte, cul nâs a ponte e la muse tirade (Alan Brusini, La ultime partence); e gjavà cun dute pachee i ocjai di chel nâs che al tirave un pôc a bec (Maria Forte, La tiere di Lansing)
   Sin. nape
   
   1. part centrâl dal music dai animâi:  il gno mus al si ferme intal mieç de strade e cul nâs par tiere al tache a nasâ (Pieri Somede dai Marcs, Ursule)
2. s.m. orghin e facoltât di sintî i odôrs:  i de tal nâs un odôr di pan fresc che i leve al cûr (Catarine Percude, Il solt del Signôr)
3. s.m. (fig.) sens de intuizion o talent naturâl:  o ai metût in pîts un cumierç di polam, che jo pai pulinârs o ai simpri vût nâs (Fabian Ros, Il lôf); a si filave lin e lane par cont di un paularin che al veve nâs pai afârs (Lorena Pellis, Radîs par cressi)
   Sin. voli
4. s.m. [TS] tecn. element mecanic, pal solit a dint, a arc o a rimpin, che al covente par fermâ parts mobilis:  il nâs dal saltel; il nâs dal clostri; il nâs dal lochet

Polirematichis e espressions idiomatichis

• a nâs loc.av.
• a voli di nâs loc.av.
• cjapâ pal nâs loc.v.
• cjoli pal nâs loc.v.
• dâ dal nâs loc.v.
• dal nâs a la bocje loc.av.
• dâle intal nâs loc.v.
• menâ pal nâs loc.v.
• meti il nâs loc.v.
• paie, nâs di cuaie loc.inter.
• petâle sot il nâs loc.v.
• restâ cul nâs gotant loc.v.
• restâ cun tant di nâs loc.v.
• riçâ il nâs loc.v.
• saltâ la moscje al nâs loc.v.
• sgnofrâ il nâs loc.v.
• sgnofrâsi il nâs loc.v.
• sierâ la puarte sul nâs loc.v.
• slungjâ il nâs loc.v.
• smocjâsi il nâs loc.v.
• soflâ il nâs loc.v.
• soflâsi il nâs loc.v.
• sot al nâs loc.av.
• sot dal nâs loc.av.
• sot il nâs loc.av.
• strenzisi il nâs loc.v.
• striçâ il nâs loc.v.
• stuarzi il nâs loc.v.
• tabac di nâs loc.s.m.
• tirâ sù cul nâs loc.v.
• tirâ sù il nâs loc.v.
• vê il nâs lunc loc.v.

Proverbis:

• a Sant Blâs al gote il nâs
• a Sant Blâs il frêt al taie il nâs
• a taiâsi il nâs, si insangane la bocje
• cui che al à bon nâs lis nase a la lontane
• cui che al à il nâs lunc lis nase a la lontane
• cui che al nas disfortunât ancje se al cole par daûr si romp il nâs
• cui che al taie il nâs al insangane la bocje
• ducj i nâs si somein e no 'nd è nissun compagn
• i câs a son come i nâs: ducj si somein e no 'nd è nissun compagn
• i gjats no muerin se no batin il nâs
• lis feminis a son tant che i gjats che se no sbatin il nâs no muerin
• se al pice il nâs, murie di sclâfs
• se si file dal nâs a la bocje, no torne su la rocje
• se si file mai tant che al rivi dal nâs a la bocje, e je une glagn che no torne su la rocje
• se tu ti tais il nâs, il sanc ti va in bocje