Dizionari de Lenghe Furlane

carete  /-rè-/  ca|re|te  [AF]

1. s.f. sorte di cjar lizêr:  Jacumin di Mondul, tornât a montâ su la carete al cjape in man lis redinis e al mole la solite legnade a la bestie (Arturo Feruglio, Pluitost di piardi dut!…); i plaseve di cori come il folc cu la carete cun doi cjavaluts che al veve (Alan Brusini, Amîs come prime); là jù su la strade viers la planure si viodeve a rivâ camions di soldâts e caretis di cosacs (Pieri Menis, Sul agâr)
   Cfr. cjar¹ , caroce , bare , barele , barelute , caret , cjaruç , brun² , landò , briscjie
   
   1. cuantitât di personis o robis puartade di chel veicul
   2. (fig.) grande cuantitât:  lis provedencis a levin jù, a caretis di milions e di miliarts (Antoni Beline, La eterne lote dai furlans)
2. s.f. (fig., scherç.) veicul vecjo e malsestât
   Sin. bidon , ferace , masanin , rotam , catan , clostri , biroç , tramai , crassigne , scrassigne
3. s.f. [TS] venat. sorte di dople cise ator ator di rocui o bressanis:  al jere il boscut dal rocul, imbraçât di ca e di là des doplis filis di çamars, cui ramaçuts cuinçâts in maniere savinte par platâ i rêts de carete (Adrian Cescje, Memoriis di politiche linguistiche); un coridôr alt di çamars, cul cîl dut tiessût a ramaçs e fueis, al formave la "carete" ator ator di un grant pieç semenât a nise e sarasin (Maria Forte, Cjase di Dalban)

Polirematichis e espressions idiomatichis

• menâ la carete loc.v.
• tirâ la carete loc.v.

Proverbis:

• al mangje plui vene chel mus che nol tire la carete
• cui che al mangje la vene che al tiri la carete
• cui che al mangje te grepie, al scuen tirâ la carete