Dizionari de Lenghe Furlane

caroce  /-ò-/  ca|ro|ce  [AF]

1. s.f. cjar, ancje elegant o lussuôs, tirât di cjavai, pal traspuart di personis:  i nobii di une volte a lavin ator in carocis cun tant di steme nobiliâr (Sandri Di Suald, Comunicâ la autonomie); tambûrs e trombetis e lusignavin in jenfre lis fueis de poolade, daûr une biele caroce plene di penacjeris (Catarine Percude, L'ucielut de Mont Cjanine)
   Var. coroce
   Cfr. brun² , carete , caretine , barel , barele , biroç , birocin , cjaruç , legnet
2. s.f. vagon di tren, tram, metropolitane, pal traspuart di personis:  il tram di Tarcint: cu lis carocis blancjis in rie, come stechis di mandolât (Sandri Secco dai Juris, Un paîs par simpri)
   Sin. vagon
3. s.f. posizion e ande di cierts uciei che a drecin lis plumis, massime dal cuel e de code, par someà plui grues e biei e concuistâ lis mascjis o spaurî altris pretendents:  si sglonfave tant che un dindiat in caroce (Roberto Ongaro, Cretevierte)

Polirematichis e espressions idiomatichis

• in caroce loc.av., loc.adi.inv.

Proverbis:

• in paradîs no si va in caroce
• la supierbie e partìs in caroce e e rive a pît