Dizionari de Lenghe Furlane

pendolâ  pen|do|lâ  [AF]

1. v.intr. jessi picjât o vincolât e movisi un pôc di une bande e di une altre, soredut par efiet dal aiar o pe inerzie:  une vielute dute gobe e jere rivade dongje cui podins che a pendolavin dal buinç (Gianni Gregoricchio, Îr e doman)
   Sin. niçulâ , niçulâsi
   Var. pindulâ
   Cfr. sbrendolâ
   
   1. jessi picjât, ancje cence movisi:  di une bree inclaudade ae parêt a pendolavin imprescj di ogni fate (Carlo Sgorlon, Prime di sere)
      Sin. vignî jù , pendâ , picjâ
2. v.intr. (fig.) stâ tun puest o lâ ator cence fâ nuie, cence cumbinâ o cence rivâ insom di nuie:  [cualchi siôr] l'à grancj cjamps lassâts in abandon, / che fuars fuars e nol sa dulà che son; / e intant al sta in citât a pendolâ / parcè che in vile lui nol sa ce fâ (Pieri Çorut, Il Strolic mezan. Pronostic par l'an 1856)
   Sin. remenâsi , pendolâsi , sbrendolâ
3. v.intr. (fig.) jessi malsigûr tra plui tindincis, lâ indevant cence sigurece:  lis personalitâts grandis e piçulis de politiche uficiâl no àn savût fâ nuie altri che pendolâ di ca e di là tant che musets picjâts te stangje (Josef Marchet, Di bessôi)
   Sin. bagolâ , cloteâ , clupignâ , niçâ , triculâ , esitâ¹ , vagolâ
4. v.intr. (fig.) vê une cierte inclinazion o preference:  di gno nono Berto jo mi visi la tenarece. Tra me e i miei fradis, lui al pendolave de mê bande (Gianni Gregoricchio, Trê feminis)
5. v.intr. jessi li li par pierdi l'ecuilibri, cul pericul di colâ:  i mole, sence tancj compliments, un papin cui flocs, di chei cui bregons di fieste, in sumis. Dopo la bulade al ziruche, parcè che el sfuarç lu à fat pendolâ, e al bacane, beât (Arturo Feruglio, I stivâi di Zuan Batiste); Madin al sburtà indentri de taule la scudiele, al jevà sù pendolant e al jessì tal curtîl (Dino Virgili, Come tornâ fruts)
   Sin. bagolâ , cloteâ , clupignâ , niçâ , scantinâ , triculâ , zighiâ , dandanâ , balâ
   
   1. no rivâ a stâ impins o a tignî sù il cjâf par vie de sium, dal sens di imbast o sim.:  al pendolà ancje un pôc, e dopo un altri pôc si pleà jù daûr cope rangussant: al durmive come un çoc (Luigi Gortani, Sant Pieri e la code da vacje); a pendolavin di sium dopo dute la gnot passade cence sierâ lûs (Dino Virgili, La aghe da pît la cleve)
6. v.intr. (fig.) pierdi fuarce e salût:  tantis [presoneris] a pendolin a Buchenwald di une robe o chê altre, e massime di riscjalt dai budiei (Ivano Urli, Storie di Vera); la anime si inflapìs e e pendole come une plante cence aghe (Antoni Beline, Sant Jacum, là che al finìs il mont)