scantinâ  scan|ti|nâ  [CO]

  1. v.tr. fâ che alc componût di plui tocs nol sedi plui ben cometût e fis:  aes dôs e mieze mi dismôf un grant sunsûr di aiar che al scantine i scûrs (Renzo Balzan, La gnot dal montafin)
    Sin. disbletâ , scloteâ , discloteâ
  2. v.tr. (fig.) fâ dam, fâ che alc, sedi materiâl che imateriâl, nol sedi plui in buinis cundizions:  il frêt prime e plui indenant lis tampiestadis i vevin scantinât fûr il vignâl (Otello Silvestri, Il rap di ue)
    Sin. disbletâ , scloteâ , discloteâ , vuastâ , fiscâ , sassinâ , drazâ
  3. v.intr. di alc componût di plui tocs, no jessi ben cometût e stabil:  i rais de ruede e scantinin un pôc tai gjaveis e bisugnarà strenzi il cercli (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
    Sin. scantinâsi , scloteâ , discloteâ , discloteâsi , disbletâsi
  4. v.intr. (fig.) no restâ in buinis cundizions, no funzionâ ben:  i partîts plui grues a puedin simpri savê indulà che la lôr fuarce e ten dûr e indulà che e scantine (Josef Marchet, No sin contents!)
    Sin. clopâ
  5. v.intr. (fig.) no compuartâsi ben, no rispietâ une norme, une regule o une cierte maniere di fâ calcolade juste:  l'om si vuardave dal straçâ, e nol scantinave tal bevi (Maria Forte, Cjase di Dalban); e la frutate ja scantinât / se cun ducj si à remenât (Tite Robul, Furlan arût. Tiarce lezion); cualchi rare volte [...] Cjandot al scantine un pôc cu lis leçs eclesiastichis dal dì di vuê (S., Nel cincuantenari de muart di pre Tite Cjandot)
    Sin. sgarâ , svargâ , scrocâ
    Cfr. tradî
  6. v.intr. (fig.) jessi in dubi, pierdi o cjapâ timp prime di sielzi o di fâ alc:  al barbote, al scantine, al scuaie il zûc / fin che al confesse dut e al pant il lûc (Spartaco Muratti, Il don di Nadâl)
    Sin. cencenâ