Dizionari de Lenghe Furlane

niçâ  ni|çâ  [AF]

1. v.tr. movi di ca e di là alc che nol è ben stabil o al à nome un pont di poie:  la int e niçave il cjâf pôc persuadude (Alan Brusini, Il coragjo de sclope); la Dele di Meston e à pierdût la peraule in chescj dîs, se no tu la sintaressis a lâ sul poç, pensant a vôs alte, e niçant i cjaldîrs scuasit a scantinâju (Maria Forte, La tiere di Lansing)
   Sin. dandanâ , dandarâ , niçulâ , sdanzâ , sdanzinâ , spacâ , spacolâ
   
   1. movi incà e inlà un frut par cuietâlu o indurmidîlu:  ju indurmidissin niçantju e cjantant (Dino Virgili, La aghe da pît la cleve); ninà ninà, pipin codai, / plui ti nici, plui tu vais (Zuan Nazzi Matalon, Ottorino Burelli, Sacheburache)
      Sin. cunâ , dandanâ , dandarâ , ninâ , niçulâ , scunâ , sdanzâ , sdanzinâ , sdrindulâ , triculâ , trindulâ
2. v.tr. (fig.) fâ che cdn. o alc si movi, si distachi di une cundizion inerziâl:  cumò nol jere nuie che lu niçàs dal so pinsîr (Roberto Ongaro, Il muc); o vevi preparade ancje une soluzion alternative, di provocazion, che e niçàs la Regjon a frontâ une buine volte lis discussions intor des normativis di tutele scolastiche de lenghe furlane (Adrian Cescje, Memoriis di politiche linguistiche)
   Sin. movi , dismovi , stiçâ , tiziâ
3. v.intr. movisi di ca e di là:  une cjampane e niçave, po si slargjave a glons misurâts (Maria Forte, La rive di Sant Pieri)
   Sin. bagolâ , balâ , dandanâ , dandarâ , ossilâ , pindulâ , clopâ , scampanotâ , sdanzâ , sdanzinâ , triculâ , trindulâ , vongolâ , pendolâ , balinâ
   
   1. (fig.) jessi inciert, malsigûr:  a Rosute no i va la barbe. […] El Sepulcri al nice. Sacrificâ la femine o sacrificâ la barbe? (Arturo Feruglio, I stivâi di Zuan Batiste)

Proverbis:

• cui che ju fâs che sai nici
• il prin al busse e imbrace, il secont nice e fasse, il tierç an il malan e la malepasche