Dizionari de Lenghe Furlane

orele  /-ré-/  o|re|le  [FO]

1. s.f. ognidune des dôs struturis anatomichis di cartilagjin e des dôs busis che a son in bande dal cjâf:  il rincjin di aur i slusignave sot la orele pendolant (Dino Virgili, La aghe da pît la cleve); un om grant e sec, cui cjavei grîs che i colavin sul cerneli e lis orelis (Carlo Sgorlon, Prime di sere); un cjavalut ruan, piel e vues, cui ombui spelâts, lis orelis une sù e une jù (Pieri Somede dai Marcs, La cavalarice)
   Var. oregle , vorele , vuarele , gruele
   
   1. [TS] anat. orghin che al covente pe percezion des vibrazions sonoris e pal ecuilibri che al è presint intal om e intai animâi di ordin superiôr:  la nestre orele no percepìs suns parsore i 15 KHz (Valentino Castellani, La societât de informazion: cirint lis origjins)
   2. (pop.) viertidure laterâl jenfri il cjâf e il cuarp dai pes, par li che e va fûr la aghe che e je passade pes branchiis:  [al pes pescjât] si veve di fâi passâ un fros di reghete o un filut di fier pe bocje, impirâjal pes orelis, par po metilu tal suei jenfri doi claps che si mantignìs fresc (Lucio Perès, A pescje tal suei)
      Cfr. bavile , branchie
2. s.f. sens che al permet di sintî suns:  e veve une agne antighe tant che un orloi di tor, cu la sbeçule infûr, tarde di orele, ma di memorie buine (Alan Brusini, Come tai romançs)
   
   1. persone che e scolte:  si sfuarçave di fevelâ cidine pe pôre di cualchi orele foreste (Maria Forte, La tiere di Lansing); cjatâ orelis che a scoltin e a capissin lis maluseriis de frustrazion (Adrian Cescje, Memoriis di politiche linguistiche)
   2. atenzion a ce che si sint, a ce che al ven dit:  une orele le tignive ancje vierte ai discors disordenâts che a fasevin i ospits (Meni Ucel, Culturis)
3. s.f. interès, sensibilitât, talent pe musiche:  la radio di vie Volturno si è za fate cognossi tra i zovins che a seguissin la musiche cuntune orele atente (Max Mauro, Un Friûl difarent: i 90 mhz di Onde Furlane)
   
   1. sensibilitât pes lenghis o par une lenghe in particolâr:  Jo o vevi capît Triest [invezit di Dresden]. No ai une orele fine (Checo Tam, La maree nere)
4. s.f. part di un ogjet che e ven infûr e par solit di forme taronde
   
   1. plee tal cjanton di un sfuei
   2. [TS] tecn. part daûr dal martiel
   3. [TS] tecn., agr. part de vuarzine che e rivolte la çope a pene rote
      Sin. spalete
   4. [TS] lead., edit. part interne de cuviertele di un libri, dispès cun stampadis informazions sul autôr o sul libri
   5. [TS] tecn. toc che al ten sù la cjampane
5. s.f. (spres., zerg.) omosessuâl
   Sin. oreglon

Polirematichis e espressions idiomatichis

• buine orele loc.s.f.
• businâ lis orelis loc.
• dî te orele loc.v.
• dreçâ lis orelis loc.v.
• fâ la orele loc.
• fâ orele di marcjadant loc.v.
• lâ in orele loc.v.
• mâl di orelis loc.s.m.
• mangjâsi lis orelis loc.v.
• puartâ la aghe cu la orele loc.v.
• puartâ la aghe cu lis orelis loc.v.
• restâ tes orelis loc.v.
• rivâ in orele loc.v.
• sbassâ lis orelis loc.v.
• segnâsi daûr de orele loc.v.
• sivilâ lis orelis loc.
• spiçâ lis orelis loc.v.
• stropâ lis orelis loc.v.
• stropâsi lis orelis loc.v.
• taçâ lis orelis loc.v.
• taiâ lis orelis loc.v.
• tirâ la orele loc.v.
• tirâ lis orelis loc.v.
• vê in orele loc.v.
• vê lis orelis lungjis loc.v.
• vê orele loc.v.
• vê tes orelis loc.v.
• vendi cul floc a la orele loc.v.
• vendi cul flôr a la orele loc.v.
• vignî in orele loc.v.

Proverbis:

• ancje in cusine i cjaldîrs e àn lis orelis
• ducj sint cu lis orelis
• il barcon al à i voi e la cise lis orelis
• ognidun al sint cu lis sôs orelis
• par fâ il predi al covente: orele di marcjadant, bocje di purcit e schene di mus