Dizionari de Lenghe Furlane

florî  flo|rî  [AF]

1. v.intr. di plante, fâ lis rosis, jessi tal moment che e fâs lis rosis:  in cjase di siore Marceline dut al jere sempliç e cjalt come i siei canelons che a florivin tal puest dai rosârs (Maria Forte, Cjase di Dalban); uì a flurissin li manuti che a fasin na panola dreta colour ciclamin e sot a àn una radîs che a pâr una man di femina (Novella Cantarutti, Li manuti)
   Sin. florezâ , floritâ
   Var. sflorî
   
   1. di rose, vierzisi:  chel aiarin de sere / che nus ven jù di Crosis, / al da confuart ae tiere, / al fâs florî lis rosis (Guido Benedetti, L'aiarin di Crosis)
      Sin. dâ fûr , rompi fûr , vierzisi
   2. di lûc, di moment o altri, cuvierzisi di rosis, jessi caraterizât des rosis:  cuant che pardut al jere dome che glace e frêt, al florì un spetacul di prât cun rosis e pomis di ogni sorte (Angelo Floramo, Il voli di Boccaccio al è il prin a rindi justizie ai furlans); co e florive Primevere [il mestri] nus clamave sui barcons (Alan Brusini, Come tai romançs)
2. v.intr. (fig.) nassi e cressi, vê vivôr, svilupâsi, prosperâ:  tal cûr ur florive la sperance che dut al finìs ben (Maria Forte, Cjase di Dalban); a tornavin a florî te cjase antighe lis costumancis vieris di famee (Dino Virgili, La aghe da pît la cleve); il Friûl al torne a ripiâ il so snait e la sô gole di vivi e di florî (Antoni Beline, Aquilee: sagre dai popui)
   Sin. cjapâ pît , cressi , florizâ , inlidrisâ , jessi in flôr , jessi in floride , lâ in flôr , passonâ , prosperâ , slargjâsi , spampanâsi , spandisi , sparniçâsi , sverdeâ , vignî sù
   
   1. rivâ a un biel compiment, a une fase di bielece e di viertidure:  "La anime - i diseve il priôr dal convent - e à di florî te sô maniere […]" (Pieri Somede dai Marcs, Co une vôs e clame)
   2. s.m.sing. moment plui biel, o, riferît a une persone, moment de prime zovinece:  a veva batût il cjâf cui sa cemont. A era na canaa sul flurî e ducj a erin restâts cunturbâts a jodala distirada su la brea (Novella Cantarutti, Il Crist sclagn)
      Sin. flôr
3. v.tr. fâ deventâ biel cu lis rosis:  in pôc timp la femine Tissie e florive i barcons cun canelons e parigjins che e deventave une bilisie e ducj le cjalavin cun rispiet (Alan Brusini, Come tai romançs); lis damis a vevin sul sen i lôr flôrs di vermene e mazorane tirâts sù tai vâs sui barcons, e a florivin ancje la caroce (Dino Virgili, La aghe da pît la cleve)
   
   1. fâ biel cun alc che al pues someâsi cu lis rosis:  e furnive di puntine lis tindinis dai barcons e e florive di ricams un cussin pal so cjadreon (Maria Forte, La tiere di Lansing); volê jessi bon da flurî i teraçs come zardins (Novella Cantarutti, Il maestri di teraçs)
4. v.intr. [BF] cuvierzisi di mufe o di incrostazions

Proverbis:

• un arbul che nol florìs nol da pomis