Dizionari de Lenghe Furlane

fedêl  fe|dêl  [FO]

1. adi. che si pues fidâsi, che al manten impegns, che al rispiete i pats, lis normis, lis leçs e v.i.:  a son tancj i stâts che a àn sot di lôr minorancis forestis: ma chei che a san tratâlis, lis àn simpri fedêls e no ur ven nissun fastidi de bande di lôr (Josef Marchet, Minorancis); Fredo, il gastalt fedêl di cheste cjase al mi protêç come che al fos mio pari (Pieri Somede dai Marcs, Mame…)
   Sin. devot , leâl , salt²
   
   1. che al è costant tai rapuarts afetîfs e amorôs, che nol imbroie e nol tradìs:  «Chest al è un cûr fedêl e no bausâr come il to» i berlave (Alan Brusini, Come tai romançs); mi vignì il pinsîr che Mafalde e sintìs ancjemò a fuart la sô vedovance e te anime e fos ancjemò fedêl a Luche (Carlo Sgorlon, Il dolfin); cjârs Nuviçs, o sin capîts: / seit costants e seit fedêi, / che cussì sarês feliçs, / e larês di ben in miei (Pieri Çorut, La Colombe di Bolzan); cjançunito va cun Dio / achelo dumnlo saludant / di cui fidêl soi sirvidô (Anonim, Piruç mio doç inculurît)
2. adi. di bestie, tacade al paron:  la cjace mê delizie, e mio dilet / plui no strache il mio brac cjâr, e fedêl (Ermes di Colorêt, I, 216)
   Sin. afezionât , devot , leâl , leât
3. adi. (fig.) di alc, che al è doprât cun regolaritât o tignût simpri dongje:  mi ritiravi in solitudin su lis rivis dal flum e cun me o vevi il mio fedêl cjaval di fier, la biciclete Montan-Baik-Girardengo (Checo Tam, Sense)
   Sin. bon , consuet , solit¹ , usuâl , brâf
4. adi., s.m. (fig.) che, cui che al è usât a stâ cun cdn. o a fâ alc cun regolaritât:  lui al tentave altris sunadis, ma po al tornave simpri plui fedêl a chê di prime che, scuasit, e lave indenant di bessole (Maria Forte, La cjase dal Murat)
5. adi. di alc, che al corispuint ae realtât o a di un origjinâl:  i dâts ufierts des listis di imbarcjament no son une font fedêl de professionalitât e de atitudin al lavôr des furlanis (Francesco Fait, La emigrazion in Australie dal Friûl - Vignesie Julie); a la tô vôs, Tonine, / fedêl da la coline / Eco respuindarà (Pieri Çorut, Primevere - Invît a Tonine)
   Sin. avuâl , precîs
   
   1. che al fâs capî cemût che a son i fats:  la lenghe in sumis e je la spie fedêl di dute la anime, sedi di une persone, come di un popul (Josef Marchet, Un element fondamentâl dal moviment autonomistic)
6. adi. di cdn. che al conte i fats cemût che a son sucedûts:  un cronist fedêl; un testemoni fedêl
   Sin. meticolôs , precîs , scrupulôs
7. adi., s.m. cui che al crôt intune divinitât e al cîr di osservâ lis regulis di une religjon, soredut di chê cristiane:  sot sere il Patriarcje, dal alt de scjalinade, al benedìs cul Santissim i fedêi inzenoglâts (Arturo Feruglio, Viaç a Vignesie)
   Sin. dissepul , seguaç , devot
   Var. fidêl
8. adi., s.m. che, cui che al crôt intune idee, intune reson, intune persone:  [Lluís Companys] al ven fusilât alì dal cjistiel di Montjuïc. Fedêl fint insom ai siei ideâi, lis sôs ultimis peraulis a son "Per Catalunya!" (Carli Pup, Teritoris - Oms di Libertât); republichins, al jere chel il non che la int ur veve dât ai fedêi de republicute di Salò (Roberto Ongaro, Il muc)
   Sin. partesan , partidant , seguaç , sostignidôr

Proverbis:

• il cjan al è il plui fedêl amì dal om