Dizionari de Lenghe Furlane

cjamese  /-mé-/  cja|me|se  [FO]

1. s.f. toc di vistiari che al cuvierç la part disore dal cuarp, par solit di tiessût lizêr e botonât par denant:  aes dîs al veve di cjatâsi in citât là dal nodâr. Al le subit a mudâsi: mude di fieste, cjamese blancje e scarpis lustris (Pieri Somede dai Marcs, La braide); e tirave fûr la blancjarie che e nulive di lavande: cjamese cui orlis a capis, bustinele, cotule sot, dut di tele di lin de plui fine (Pieri Somede dai Marcs, La Madone dai siet dolôrs); ce gust vistîsi di arlechin e cumò biade la ore si veve metût sù i bregons e la cjamese di mil colôrs (Spirt Anonim, Eracsam)
   Var. cjemese , cjimese
   Cfr. cuel¹ , dacuel , fassete , manie¹ , viertine , viertidure , cûr , daman¹ , scovet , spalete , spalin , scovetin , spale , pieç , manighet , boton¹ , asule , petorine , pedane , pugn
   
   1. cuantitât di robe che e sta dentri di chel toc di vistiari se si lu dopre tant che contignidôr:  un cjapiel di coculis (Giulio Andrea Pirona, Novo vocabolario friulano)
      Sin. cjapielade
2. s.f. toc di vistiari intim, avonde lunc, metût sot di chei altris vistîts o par lâ a durmî:  agne Mie la Mate, e lave ator di gnot pal curtîl, cul feralut impiât, la cjamese blancje fin sul vues rabiôs, come une agane, incretade sul scrupul che tal scûr i strafuissin la sô robe (Maria Forte, I arcs)
3. s.f. [TS] bot.com. rivistiment di ciertis pomis o plantis e v.i.:  la cjamese des nolis (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
4. s.f. [TS] tecn., edil. rivistiment cun funzion di protezion o isolament
   Sin. capot
5. s.f. complès di membranis che a involucin il frutin te panze de mari e che a puedin restâi intor cuant che al nas:  i benandants a son oms e feminis che, pal fat di jessi nassûts cu la cjamese, a àn podês particolârs e ju doprin pal ben (Sandri Carrozzo, Friûl di Magance)
6. s.f. sfuei blanc grant, pleât par tignî dentri altris sfueis:  metii une cjamese a chês cjartis, e scrivii parsore: "Documents antîcs" (Giulio Andrea Pirona, Novo vocabolario friulano)
   Cfr. cartele , cartolâr , cartelute

Polirematichis e espressions idiomatichis

• cjamese di fuarce loc.s.f.
• restâ in cjamese loc.v.
• sbregâsi la cjamese loc.v.
• sudâ cent cjamesis loc.v.
• sudâ siet cjamesis loc.v.
• sudâ trê cjamesis loc.v.
• vê la cjamese nete loc.v.

Proverbis:

• a litigâ, un al reste in cjamese e chel altri biel nût
• cui che al à la cjamese scuintiade che al stedi atent che no i colin i bregons
• cui che al à pocje tele che al fasi curte la cjamese
• cui che al file al à cjamese, cui che nol file ind à dôs
• cui che al lavore al à une cjamese e cui che nol lavore ind à dôs
• cui che le vuadagne al reste in cjamese, cui che le piert al reste nût
• di sabide soreli benedet par suiâi la cjamese al puaret
• e je prime la cjamese dal vistît
• e vûl tele a fâ cjamesis
• la piel e je ancjemò plui dongje de cjamese
• magari in cjamese ma che al plasi
• no bisugne mostrâi a dinissun la cjamese sporcje
• prin viôt se tu âs la cjamese sporcje po scuintiije a di chei altris