Dizionari de Lenghe Furlane

cinc  cinc  [FO]

1. s.m. numar di unitâts plui grant dal cuatri e plui piçul dal sîs e segn grafic che lu rapresente:  "Cuatri!…" "Sîs!…" "More!…" "A ti Bepo!…" "Doi!…" "Ducj!…" "Cinc!…" "More!" (Arturo Feruglio, L'ultin di carnevâl là di Plet)
2. adi.num., pron.num. in cuantitât di un parsore dal cuatri, ancje cun valôr sostantivât o cun sostantîf sotintindût:  il neon al lampave dôs o trê voltis e mi mostrave une stanzie gnove là che cinc o sîs taulis a jerin prontadis cu lis tavaiis parsore (Alan Brusini, Gian Paolo Linda, I forescj); i autonomiscj dal Trentin e Bas Tirôl che a jerin dividûts in cuatri o cinc moviments in contrast un cul altri (Josef Marchet, Esam di cussience); el famôs puint di piere che al unìs la tiere ferme cun Vignesie [al] à costât cinc milions di svanzighis (Arturo Feruglio, Viaç a Vignesie); calmaitsi…, che no ai finît di dîus il piês… A àn tes mans un cuatri, cinc dai vuestris… cjapâts pe strade e intai passons (Alviero Negro, Int di masnade)
   
   1. adi.num., s.m. ancje cun valôr di ordenâl o identificatîf intune serie o intune categorie
      Sin. cuint
3. s.m. spec. tal pl., cuint dì dal mês:  ai cinc di Avost dal '67 e rivà la cjarte cu la acuile muche da cjâf scancelade cu la pene, dulà che il Tribunâl provinciâl di Udin al ordenave di presentâsi ai 28 di chest al dibatiment dal procès (Dino Virgili, La aghe da pît la cleve); il cinc di Novembar dal 1918, oms e feminis a vendevin gjornâi pes stradis di Pescara vosant che la vuere e jere finide (Alan Brusini, Come tai romançs)
   
   1. il cuint an di un secul
4. s.m. vôt scolastic a pene sot de suficience:  il compit nol è lât tant ben, o ai cjapât cinc
5. s.m. cjarte di zûc marcjade tant di mostrâ che e je la cuinte intune schirie:  butâ il cinc di baston
6. s.f.pl. cuinte ore daspò de miezegnot:  la matine mi jevi aes cinc (Vittorio Vittorello, A ogni cost); la matine - a cinc di Istât e a sîs di Unviar - e jere une altre volte impins (Gianni Gregoricchio, Îr e doman)
   Sin. cinc di matine , cinc a matine , cinc di buinore , cinc a buinore
   
   1. cuinte ore daspò misdì:  a saran stadis lis cinc, cuant che 'Sef si invià pe strade de Tor; e jere cuasi sere (Nadia Pauluzzo, Il bintar); "O ai sintût di un concert tal cjiscjel di Colorêt, domenie cu ven, dopomisdì. Si podarès lâ, no mo?" e la cjalà, in spiete. -"Sì, une buine idee." "Alore aes cinc o passi a cjolti" (Jolanda Mazzon, Fûr di timp)
      Sin. cinc di sere , cinc dopomisdì , disesiet

Polirematichis e espressions idiomatichis

• vignî sù chei cinc minûts loc.v.
• vignî sù i cinc minûts loc.v.

Proverbis:

• cinc ruedis int un cjar no stan ben
• cuant che la buere si mûf, o un o cinc o nûf
• cun chel che a mangjin cinc, a mangjin sîs
• dulà che a stan cinc a stan ancje sîs