Dizionari de Lenghe Furlane

barcon  /-òn/  bar|con  [FO]

1. s.m. viertidure tai mûrs difûr di un edifici par lassâ passâ aiar e lûs, ma pal solit no par che a passin lis personis:  in chê dì a buinore ducj i barcons, scûrs difûr e veris didentri, e jerin vierts, spalancâts, tant che l'aiar al jentrave cun dute libertât (Pieri Menis, La int); e spalanca i veris e, metint il cjâf fûr dal barcon, la clamà (Pieri Somede dai Marcs, Une conference di padre Gemelli); al sglavinave [...] e dut ce che si podeve viodi cjalant fûr pai barcons al jere un nuie colôr di plomp (Agnul di Spere, Josefine)
   Sin. fignestre
   Var. balcon
   Cfr. plane , basse , erte , antîl , soiâr , scûr² , bertuele , pivot¹ , mantie , suaze , curnîs , scurete , veri , vereade , rame² , lastre¹
   
   1. furniment di chê viertidure, pal solit formât di un o plui telârs cun lastris di materiâl trasparent:  “Jeve! Tiriti sù dal jet! ” cussì mê mari mi dismoveve ogni buinore, in zonte dal sdrondenament dai barcons che e spalancave e dal vuicâ dai cancars dai scûrs (Diego Navarria, La misure dal salam); al tirà sù il clostri dal barcon, chel dai scûrs, e cun gracie, cence fâju ciulâ, ju vierzè (Raffaele Serafini, Soreli jevât a mont)
   2. sorte di portele di len, che si pues vierzi o sierâ sul difûr di un barcon, par fâ jentrâ o no fâ jentrâ lûs:  "Al viodie chel cjasâl là vie?" "Chê cjasone grande a drete? cui barcons ros là in bande?" (Dolfo Zorzut, Chel cjamp ta gravis); al si à vissinât e, tirant i vui par li sfesis dai barcons, al è rivât a conossi (e tant ben!) un di chei aventours che a erin dentri (Ovidio Colussi, Il pilustrât)
      Sin. scûr² , scurete
2. s.m. (fig.) pont di osservazion, pussibilitât di viodi e cognossi:  ta cheste tiere a vivin altris comunitâts etnichis che nus vierzin un barcon sore la Europe (Adrian Cescje, Memoriis di politiche linguistiche)
   
   1. atenzion o sezion specifiche dedicade a alc:  un tierç barcon dal festival al è chel che si vierç sul cine rus (Fabian Ros, Festival di Pesaro 50+1)
3. s.m. (fig.) spazi libar, vueit:  i è colât un dint di lat, di chei devant, e i à lassât un barcon
4. s.m. spazi trasparent di ciertis bustis li che si pues lei sot la direzion
   Sin. barconete
5. s.m. (fig.) tal lengaç gjornalistic o burocratic, dade di timp, cun riferiment in mût speciâl a cuant che un lavoradôr, che al à il dirit ae pension di anzianitât, al pues pardabon gjoldilu
   
   1. situazion che e permet di fâ alc di plui, di diferent dal rest:  la brame di vierzi barcons di riflession intune societât che e mude (Ilarie Colùs, La lustre matetât dal siôr Chissot furlan); il Premi Friûl, lis cunvignis, la colaborazion cun Festintenda e il jessi pardabon un pont di incuintri par tantis associazions: un barcon , un dai pôcs, li che a puedin fâ alc (Matteo Fogale, Bon complean, Onde Furlane!)
6. s.m. [CO, TS] inform. ogjet grafic che al comparìs tal schermi dulà che par solit si puedin davuelzi operazions autonomis rispiet al rest de visualizazion:  sierâ il barcon di dialic
   Sin. barconete
7. s.m. [TS] tipogr. spazi in evidence di forme plui o mancul cuadrade, pal solit delimitât di liniis
8. s.m. [TS] fis. interval di frecuencis intun spetri

Polirematichis e espressions idiomatichis

• soiâr dal barcon loc.s.m.
• vierzi puartis e barcons loc.v.

Proverbis:

• al è miôr un tacon che no un barcon
• ancje i barcons a àn i veris
• il barcon al à i voi e la cise lis orelis
• il Signôr al siere une puarte e al vierç un barcon
• la caritât a va fûr pal porton e e jentre pal barcon
• la caritât e jes pe puarte e e torne pai barcons
• la mê scjale no rive ai tiei barcons
• la tô scjale no rive ai miei barcons