Dizionari de Lenghe Furlane

mostri  /-ò-/  mos|tri  [AF]

1. s.m. figure dal mît o de liende cun nature ibride o carateristichis ireâls:  i lotofacs, lis sirenis, i antropofacs, mostris e divinitâts che a judin o che a fasin cuintri a son tal imagjinari coletîf dai marinârs e di ducj i oms di simpri (Sandri Carrozzo, Pierluigi Visintin, Jentrade de Odissee); jo e Giorgio o vin cjapât i cussins e o vin fat come un fuartin par difindisi se al ves di rivâ il mostri (Checo Tam, Ombris)
   Var. mostro , moscjo , ostro
2. s.m. (fig.) persone cun carateristichis anormâls e negativis:  [Dostoevskij] al voleve mostrâ che lis personis cu la epilessie no jerin mostris (Redazion SSTF, Epilessie e creativitât leterarie in Fyodor M. Dostoevskij)
   
   1. persone une vore brute
      Sin. abort , cragne , crodie , sgrembi
3. s.m. [TS] med. creature embrionâl cun deformazions congjenitis
   
   1. biochim. individui vegjetâl o animâl deformât, diferent di chei altris individuis de sô specie o raze
4. s.m. (fig.) criminâl crudêl, spec. maniac sessuâl
   Sin. bestie
5. s.m. (fig.) persone che e à carateristichis positivis o negativis une vore fuartis:  un mostro di fuarce (Giulio Andrea Pirona, Ercole Carletti, Giovanni Battista Corgnali, Il Nuovo Pirona); Bastian al è une cjosse sorprendent, / l'è un mostro di talent (Pieri Çorut, Bastian)
   Sin. diaul , gjeni , portent
6. s.m. (scherç., fam.) apelatîf negatîf gjeneric, ancje in imprecazions:  une mostre di femenate e veve la pretese che i fitàs la cjase, e parcè che i ai dit di no, mi à dit di dut (Pieri Somede dai Marcs, Cjase di fitâ); Mostre di miseriate, che si à simpri di tasê, simpri di tasê! (Pieri Somede dai Marcs, Lassait che mi sbrochi!)
   Sin. maledet , benedet
   
   1. apelatîf par alc o cdn. che al fâs insiemi maravee, amirazion, disperazion, disaprovazion:  ce aio di metimi a fâ […] cun chê mostre di frute, che in fonts e à reson (Costantino Smaniotto, Co l'amôr al cimie)
7. adi. (fig., fam., iperb.) une vore grant:  al veve une pôre mostre di murî (Enrico Martina, Ricuarts e inlusions); scrivi di Silvio mi coste une fature mostre (Gianni Gregoricchio, Trê feminis)
   Sin. enormi , fenomenâl , portentôs , prodigjôs , spropositât , straordenari , ecezionâl , trement , teribil , fûr di misure , fûr dal vade , diaul , bestiâl