Dizionari de Lenghe Furlane

jet  /-è-/  jet  [FO]

1. s.m. mobil cuntune struture che e ten sù midiant di une rêt di metal o di dovis un stramaç cun bleons e cuviertis par durmî o polsâ:  so fradi tal jet vicin al durmive come un çoc, dute la cjase cidine, difûr nancje un chic (Pieri Menis, Nadâl ancje par Gjelmin); tal jet si remenave cence podê cjapâ sium (Roberto Ongaro, Il muc); la matine a jerin restâts tal jet fin tart (Agnul di Spere, In viaç di domenie); in chel moment si lassave colâ in senton sul jet (Gianni Gregoricchio, Trê feminis); Micjeil al era marangon e al faseva di dut, jets e armârs, cuni e cassi (Novella Cantarutti, Micjeil di Citia)
   Var. liet¹
   Cfr. materàs , stramaç , paion , cussin , bleon , intimele , cuvierte , cuzine , cavalet¹ , cocjete , cjaveçâl , spuinde , testiere , bandinele
2. s.m. (ancje fig.) il durmî, il polsâ, il mût di passâ la gnot:  il jet mi pese se ben che mi sint tant strache, mi sentarai dongje il fûc (Pieri Somede dai Marcs, Vilie di Nadâl (teatri)); Bielite e vaìve di gnot cuintri dal cussin ruspiôs, e il jet al jere di baraçs, strafont di lagrimis (Dino Virgili, Il cûr te tiare)
   Sin. polse
   
   1. il jessi malât, il vê un mâl che al oblee a polsâ:  cumò cu la femine tal jet al viodeve lui des bestiis, al impiave il fûc, al faseve un got di brût (Dino Virgili, La massarie); nol à fate une dì di jet (Riedo Pup, Viliacco)
   2. intimitât sessuâl o coniugâl:  ti ai fat di femine, di mari, di sûr, di segretarie, e ti ai ancje tignût simpri cjalt il jet (Antescûr, Alc si è rot)
3. s.m. strât che si poie o si distire alc sore:  [il folp a la galiziane] si pues ancje servîlu cuntun jet di patatis che si à spelât taiât a fetis e cuet te aghe vanzade dopo cuet il folp (Sandri Carrozzo, Polbo á feira - Folp a la galiziane)
4. s.m. ingjâf intaiât tal teren par li che e passe la aghe di un flum:  lis granadis a passavin ciulant rabiosis, lant a sclopâ abàs jù pai crets, jù pai prâts, jù pai boscs e tai jets dai flums (Pieri Menis, Cemût che o soi restât caporâl); il Riu di Forcje al ven jù […] intun jet larc e profont plen di clapons (Marisa Moretti, Neveade)

Polirematichis e espressions idiomatichis

• butâ fûr dal jet loc.v.
• butâ jù dal jet loc.v.
• butâsi in jet loc.v.
• fâ il jet loc.v.
• lâ intal jet loc.v.
• lâ tal jet loc.v.
• sul jet di muart loc.av.

Proverbis:

• cui che al à pissât tal jet che nol disi di vê sudât
• cui che al cjante in taule e in jet al è un mat perfet
• cui che al mangje ufiei al pisse tal jet
• cul cjalt dal jet no si scjalde la cite
• il jet cjalt al fâs la mignestre frede
• il jet no si lu fâs par durmî une sole sere
• ni in taule ni in jet no si puarte rispiet
• pan pe fam, aghe pe sêt e jet pe sium
• Sant Benedet un par sorte, doi par jet
• sossedarie: o jet o panarie
• tal jet se no si po durmî si polse