Dizionari de Lenghe Furlane

indulà che    [FO]

1. loc.coniun. cun valôr locatîf par introdusi relativis, interogativis indiretis o ancje interogativis diretis cence inversion dal pronon subiet aton:  sot la mont di Borgnan al è un sît indulà che il Judri al jentre tal cret (Catarine Percude, Lis aganis di Borgnan); o sin stadis sù in Cjargne, jo e lis frutis, te cjase indulà che o vin vivût par agn (Jolanda Mazzon, Fûr di timp); "[…] E cumò nus disarês indulà che al è lât a platâsi" (Gianni Gregoricchio, Îr e doman)
   Sin. dulà che , li che , là che
   
   1. ancje in riferiment a alc che nol è un lûc fisic, ma un moment, un argoment, une situazion, une eventualitât e v.i.:  i pareve di vivi intun sium sureâl, indulà che la sô volontât e valeve mancul di nuie (Franca Mainardis, Grivôr); i jere restât tal cjâf dome chel fruçonut de storie romane indulà che a contin lis crudeltâts e strambetâts di Caligule (Alviero Negro, Il Nin)
2. loc.coniun. ancje par introdusi une precisazion, une esplicazion:  il probleme al è descrit intune relazion une vore simile ae precedent (2): [XG YG ZG] = [XGP YGP ZGP] + R(T) [XP YP ZP] (3) indulà che: XG P, YG P, ZG P a son lis coordenadis incognitis (Domenico Visintini, Lis Termis Romanis e la Basiliche Patriarcjâl di Aquilee studiadis midiant lis modernis tecnichis di rilevament e di rapresentazion)
   Sin. dulà che , li che , là che
3. loc.coniun. par introdusi une conclusive o une consecuence:  al è ancjimò tal jet cul preventivât brusôr di stomi, indulà che al à scugnût bevi dôs buinis sedons di chel Paliano che par fortune mi jere vanzât a mi (Arturo Feruglio, Viaç a Vignesie)
   Sin. e cussì , alore , par la cuâl , duncje
   
   1. par introdusi une causâl:  "Vuê o ai fieste e la passi cun pre Nocent indulà che e son vincjenûf agns e cuatri mês che no lu viodevi!…" (Arturo Feruglio, Viaç a Vignesie)
      Sin. parcè che , stant che , viodût che , par vie che
4. loc.coniun. par introdusi une aversative:  a àn stiçât chel odi di raze, chel pangjermanisim, chel panslavisim e chel panitalianisim che nus à metûts in sest cussì ben; indulà che noaltris, par cont nestri, o vevin cjatade la fate di metisi dacordo cun todescs e cun sclâfs, di lavorâ e di tratâ cun lôr (Josef Marchet, No si à di judicâ il passât cu la mentalitât di cumò)
   Sin. li che , dulà che , intant che , invezit , impen¹ , là che

Components:

• indulà av.