Dizionari de Lenghe Furlane

imberdeâsi  im|ber|de|â|si  [AF]

1. v.pron.intr. formâ grops o jessi fat sù in maniere complicade o restâ incjastrât o ingropât:  fâ in mût che, butant il lamp [l'am di pescjâ], no si imberdeàs, di tant lunc che al jere il fîl, tai ramaçs dai pôi (Lucio Perès, A pescje tal suei)
   Sin. ingropâsi , intorcolâsi , intorteâsi , ingredeâsi , gredeâsi , involuçâsi , imbroiâsi
   Var. imbredeâsi , imbardeâsi
2. v.pron.intr. no rivâ a movisi ben:  "Sta atente di no restâ a scûr, di no imberdeâti ta cotulis; se tu colis, viôt di clamâmi di bot" (Dolfo Zorzut, No je plui vive); la vôs si distudave tal gargat e la lenghe si imberdeave in bocje (Dino Virgili, La aghe da pît la cleve)
   Sin. imbarbaiâsi , imbroiâsi , ingjambarâsi , ingropâsi , leâsi , peâsi , intrigâsi , ingredeâsi , imbranâsi
   Cfr. inçopedâsi
3. v.pron.intr. (fig.) deventâ plui complicât, plui disordenât, plui dificil:  i pinsîrs si imberdeavin tal so cjâf e a contindevin tra di lôr in maniere une vore contraditorie (Fabian Ros, Eivissa mon amour); la distinzion tra il ben e il mâl che e varès di jessi la plui facile, la plui naturâl, tantis voltis si imberdee in mil musis e opinions (Dree Valcic, Semplicitât su la strade par Aquilee)
   Sin. berdeâsi , complicâsi , confusionâsi , ingredeâsi , ingropâsi , incrosâsi , gredeâsi , imbroiâsi
4. v.pron.intr. (fig.) finî dentri in situazions, soredut negativis, di dulà che al è dificil saltâ fûr:  lât a vore vie par la Italie si jere imberdeât cuntune altre e al veve scugnût sposâle che se no i varessin fruçâts i vues la parintât di jê (Pieri Menis, Si disarès che e je inventade); sì, al scugnive tornâ vie prin di imberdeâsi intun glimuç di sperancis sence nissune fonde (Mario De Apollonia, Il timp par ledrôs)
   Sin. impeolâsi , impetolâsi , impastoreâsi , ingredeâsi , gredeâsi , incjastrâsi
5. v.pron.intr. (fig.) cjatâsi intune situazion o intune cundizion psicologjiche li che no si sa ce dî, ce fâ o no si rive adore di dî e di fâ ce che si volarès:  “Cui? Jo? No, jo no sai fevelâ. Mi imberdearès . Miôr cirî un altri, siôr segretari.” (Gianni Gregoricchio, Îr e doman)
   Sin. conturbâsi , turbâsi , imbaraçâsi , ingropâsi