Dizionari de Lenghe Furlane

pas¹  pas  [FO]

1. s.m. ognidun dai moviments che a fasin lis gjambis par cjaminâ:  o fasei cualchi pas viers la fontane (Carlo Sgorlon, Il dolfin)
   Sin. varc
2. s.m. maniere di cjaminâ:  al voltà vie cuntun pas strac e malsigûr (Zuan Lurinçon, La Madalene); al vignive indenant cul so pas comut, cjalant la lune (Maria Forte, Cjase di Dalban); 'Sute e vignive indevant cul pas descul (Dino Virgili, La aghe da pît la cleve); o marcji par stradis mai viodudis, cun pas franc e sigûr, ancje se il cûr al è ansiôs (Arturo Feruglio, Viaç a Vignesie)
   Sin. ande
3. s.m. rumôr dai pîts cuant che si cjamine:  dopo une orute o pôc di plui, a sintirin il pas de scuadre che e rivave a dâ di mude (Roberto Ongaro, Il muc)
   Sin. pescjarili , talpetâ , talpinâ , talpinament , trapetâ
4. s.m. distance aprossimative cuvierte cuntun sol moviment di un pît devant di chel altri, dispès in espressions che a vuelin dî une distance curte:  lis seris de sierade, neris e fondis come poçs, di no viodi a un pas (Alan Brusini, Par stradis lungjis)
   
   1. [TS] metrol. unitât di misure di lungjece di prime dal sisteme metric, che e corispuint a 5 pîts e plui o mancul a 1.70 m., ancje cun variazions daûr de ete e dal lûc:  lâ a bruscjâ pai rivâi e dâ dongje un pas di fassuts pal Invier (Pieri Somede dai Marcs, Caritât); o i soi vuarp o a nencja votsent pas dai nustris zovins i jôt cjavai, e omis, e armis, dut un lusour… A vegnin ca (Pier Paolo Pasolini, I Turcs tal Friûl)
      Cfr. pît , once , braç , cuarte
   2. (fig.) distance teoriche, ideâl, astrate e v.i.:  de incomprension e de no acetazion al odi e ae xenofobie il pas al è une vore piçul (Sandri Carrozzo, Notis di politiche linguistiche par un Friûl diferent)
5. s.m. figure di danze:  un pas daûr chel altri, i pîts a dissegnâ figuris sul paviment (Antescûr, Milonghe)
6. s.m. (fig.) iniziative, azion par rivâ a un fin:  nol è stât fat de bande dai dirigjents dal partît un pas par judâ cheste imprese (Max Mauro, Un Friûl difarent: i 90 mhz di Onde Furlane); al è stât fat cualchi pas indenant significatîf inte atuazion de normative regjonâl di tutele (Marc Stolf, Masse planc e cence plans. L'ûs public de lenghe furlane)
   
   1. mudament, spec. in miôr, progrès:  se tu ti maridis, a disin che nol coventave che tu fasessis chel pas a la tô etât; se no tu ti maridis, a mormorin che tu sês un vedranat (Roberto Ongaro, Cretevierte)
7. s.m. toc di un test o di une opare leterarie o musicâl:  intun pas di "1984" i pareve che il scritôr al fos rivât tant dongje a ce che al provave lui cuant che al faseve i bruts insiums (Checo Tam, Vencul)
   Sin. toc¹ , bocon , pagjine , pont , passaç
8. s.m. [TS] tecn. distance fisse jenfri doi elements che a son in sucession intune tacadure, intune zonte, lis distancis dai filets di une vît
9. s.m. [TS] cinem. distance jenfri doi fotograms
10. s.m. [TS] autom. distance che e je tra l'as devant e chel daûr
11. s.m. [TS] ecuit. maniere naturâl di cori dal cjaval, mancul svelt dal trot:  il cjaval al lave a pas sù par Cleve (Dino Virgili, La aghe da pît la cleve)